علق إبراهيم سعيد، نجم النادي الأهلي السابق، على تصريح حسين لبيب، رئيس نادي الزمالك، بأن نادي الزمالك أكبر قلعة رياضية في مصر. وقال إبراهيم سعيد، في تصريحات تلفزيونية عبر فضائية «النهار»: «فوجئت بتصريح لحسين لبيب، بيقول (دايما بحب أقول وأكرر أن نادي الزمالك أكبر قلعة رياضية في مصر)، ما التصريح ده اتقال الأسبوع اللي فات، إيه اللي رجعه تاني! أنا كلمت إعداد البرنامج قولتلهم (في حد زعل الكابتن حسين لبيب، أو في حد رد عليه». وأضاف: «فوجئت التصريح نزل على شاشة قناة الزمالك وهينزل على تشيرت اللعيبة وهيتعمل دخلة لجماهير الزمالك، أنا عايز أفهم في إيه؟ مين مزعل حسين لبيب خلاه يقول التصريح ده تاني، خلاص إحنا هنفضل كل أسبوع في التصريح ده». وتابع: «نادي الزمالك اسم كبير محدش يقدر يتكلم، الكبير مش محتاج يقول إن هو كبير، الكبير مابيقولش، الكبير بيتكلم بالبطولات وبيتكلم بتاريخه، الزمالك تاريخ كبير سواء في مصر أو الوطن العربي وأفريقيا، محدش يقول غير كده». وأتم: «إيه السبب إن كل فترة يبقى في تصريحات غريبة من نادي الزمالك، التصريح بالبطولات ولا مجرد كلام وشعارات بس، يعني أنا مثلا افضل مدافع هل اكتب على التشيرت افضل مدافع وامشي في الشارع، هل أنا محتاج اتكلم؟ الإنجازات هي اللي تتكلم والناس هي اللي تتكلم».