استنكر الإعلامي عمرو أديب، تلويث ترعة العزيزية بمحافظة الجيزة، قائلًا: «بنصرف مليارات على مشروعات تبطين الترع وبتضيع في الهوا، يا جماعة لو مش ناويين تاخدوا بالكم من الحاجات اللي بتتعمل، قولوا لنا بدل ما نصرف فلوس على الفاضي، إيه حالة التدمير الذاتي اللي إحنا فيها دي؟! ». وطالب الإعلامي عمرو أديب، الحكومة المصرية بوقف مشروع تبطين الترع، قائلًا: «المصريين مش عاوزينه، المصريين بيبوظوه، وقفوا الكلام ده حرام، دي فلوس بتروح، ليه بعض الناس متخصصة إنها ترجعنا لورا؟! دي بلد مواردها على قدها». وأضاف أديب، خلال تقديم حلقة اليوم من برنامج «الحكاية»، الذي يعرض عبر شاشة «MBC مصر»: «لقيت واحد بيقول مش لاقيين حتة نرمي فيها الزبالة، طب ده المكان؟! ترمي الزبالة في الترعة؟! ده شريان حياة يا جماعة، مش قادرين نضع القمامة في كيس؟!». وتابع: «مهما المحليات عملت، بعض الناس قرروا إنهم يرموا القمامة في الترع كعقاب رسمي، يبقى خلاص يقولوا لنا، كدة التبطين والفلوس اللي بنرميها في الأرض ملهاش لازمة، والمزارع اللي بنوصل لها المياه، نوصل لها المياه بالعربيات، ونلغي ونسطح الترع بجبس وأسمنت». وواصل أديب: «إنتو ليه بتعملوا في بلدكم كدة، فيه مليون طريقة نخلصها بيها من الزبالة، يا جدعان مفيش مياه، عندنا مشكلة مياه، ومينفعش اللي بيتعمل في المياه». وأشار، إلى أن نفس السلوك تكرر في أكثر من محافظة على مستوى الجمهورية في الترع والمخرات: «مبقيناش بنعمل حاجة غير إننا قاعدين نشيل زبالة من مجاري المياه».