أدلى فاروق جعفر، نجم الزمالك السابق، برأيه في تصريح رئيس الزمالك حسين لبيب، أن «الزمالك أكبر قلعة رياضية في مصر». وانتشرت عبارة «الزمالك أكبر قلعة رياضية» على السوشيال ميديا بشكل واسع خلال الأسابيع الماضية بعد فوز الزمالك على الأهلي بكأس السوبر المصري. وقال فاروق جعفر في تصريحات تليفزيونية عبر شاشة «أون تايم سبورتس»: «التصريحات حول أن الزمالك أكبر قلعة رياضية في مصر المنتشرة على السوشيال ميديا تضر أكتر ما تفيد، بتخلق العصبية من تاني وكل واحد بيقول اللي حاسس بيه، فلازم نكون واقعيين شوية في التصريحات». وأضاف: «احنا بنعيش أحسن فترة رياضية في مصر، الإمكانيات مذهلة وكل حاجة متاحة من حيث الملاعب والاستادات، عايشين في عز على المستوى الرياضي». وأكمل: «احنا كنا من 4 سنين بنافس الدول العربية، أما دلوقتي هما بينقلوا كل حاجة تخص الرياضة المصرية، عشان بقى عندك منتج ناجح، ونسبة مشاهدة عالية جدًا».