فاهم: على فكرة الريس مرسي اتضح أن مخه شغال جامد فهيمة: أخيرا عرفت مش بقولك من زمان قرب منه هتعرفه أكتر لكن إيه اللي غير رأيك فاهم مط شفايفه لقدام وتمطع: اللي عمله مع رموز المعارضة والقوى السياسية بالظبط زي مذبحة محمد على فهيمة زعلانة: مذبحة ليه هو إيه اللي حصل فهمني. فاهم: أبدا يا ستي الحوار اللي عمله معاهم ادي تعليمات لرجالته في القصر أن الحوار يكون على الهوا فهيمة: طب ودي فيها إيه ما هوده بيحصل كل مرة فاهم: لا ناصحة هو كده ضرب عصفورين بحجر واحد الأول خلي بتوع إثيوبيا يعرفوهم كويس عشان لو حبوا يعملوا حاجة معاهم يبقوا معروفين نفر نفر. فهيمة تضرب على صدرها: مستحيل يكون ده تفكير الريس أبدا. فاهم ضاحكا: يا بنتي انتي طيبة هو المخطط للتخلص من المعارضة والإخوان بره اللعبة فهيمة: لأ طبعا ده تفكير مش مظبوط ما هو لو عايز يتخلص منهم كان قال لهم روحوا إثيوبيا وكانت العملية خلصت فاهم: خلي بالك من حاجة أن الريس مرسي ساب الرجالة تتكلم براحتها وهو في الآخر قال إن جماعة إثيوبيا أشقاء لينا ومش ممكن نضرب عليهم طلقة زي متظاهري التحرير. فهيمة: لأ لأ لأ ده كلام غلط يعني عايز تقول إن الريس سلم الرجالة لبتوع إثيوبيا تسليم أهالي لا يا روح الروح كلامك غلط. فاهم: مش بعيد بتوع إثيوبيا يعملوا ليهم سحر وتبقي فرجة قدام العالم كله وكله كوم واللي قاله كوم تاني. فهيمة: قال إيه بس الرجل الطيب فاهم: قال إيه إحنا أشقاء لا وكل شوية يبص على الكاميرا يقول لهم أنا مش معاهم سد النهضة شريك في النهضة ومكانش ناقص غير أنه يتحزم ويديها عشرة بلدي النهضة النهضة وإثيوبيا طلعت نهضة وعاش السد وعاش النيل ومصر والسودان مش محتاجين واديني اديني والنهضة طلعت صيني وحسبي الله ونعم الوكيل فيكم.
