أهلاً وسهلاً بيكم في حلقة جديدة من حلقات "جمالك من الطبيعة مع رانيا"... وحلقتنا النهارده هتكون حلقة خاصة جداً، هنردّ فيها على بعض من المشاركات اللي وصلت لنا منكم الفترة اللي فاتت... وطبعاً في البداية عايزة أشكر كل الناس اللي بعتوا لنا كلام جميل، ونتمنى دايماً إننا نكون عند حسن ظنكم بينا، ونقدر نعمل لكم كل حاجة مفيدة، علشان تتمتعوا بشعر طويل وتقيل، وبشرة نضرة ومشدودة... تعالوا نشوف بعض الأسئلة اللي وصلت والردود عليها... * هل الوصفات والماسكات اللي موجودة في الحلقات ممكن تنفع للولاد ولا لأ؟! آه طبعاً.. خلطات الزيت الخاصة بالشعر اللي قلنا عليها في الحلقات اللي فاتت ممكن تنفع للولاد، وممكن الولاد يعملوا حمام الزيت أكتر من مرتين في الأسبوع، لأن شعرهم بيكون أقصر وبيكون مُعرّض للتراب والتلوث أكثر.. فبالتالي بيحتاجوا يغسلوا شعرهم أكتر من مرتين في الأسبوع. * إيه رأيك في بعض أنواع الصبغات الموجودة حالياً زي "باليت" و"جارنييه"؟! الماركات دي كويسة ومش بتسبب تساقط الشعر زي الماركات الرديئة التانية، لكن أنا عايزة أنصح أي حد عايز يصبغ شعره إنه يعمل ماسك الكاموميل بعد الصبغة، وهو عبارة عن: (4 - 5 ملاعق كبيرة كاموميل مطحون + 2 ملعقة كبيرة عسل نحل + 1 / 4 لتر من مغلي الكاموميل). بنعجن المكونات دي كلها مع بعضها ونوزعها على الشعر بعد الصبغة مباشرة، والماسك ده بيقوي الشعر وينعمه، وكمان بيدي له شكل كثيف وتقيل. * لما باعمل إزالة لشعر الوجه بالفتلة أو بالسويت؛ بتظهر عندي حبوب، وخاصة في منطقة الأنف.. أعمل إيه؟! ممكن نعمل إزالة للشعر بالشمع، لأنه بيساعد على إزالة الحبوب، وكمان بعد إزالة الشعر ممكن نعمل ماسك مكوّن من: (ملعقة ردة + ملعقة ترمس مطحون + 1 / 4 ملعقة زيت ورد + ملعقة عسل نحل). بنخلط كل المكونات دي مع بعضها بميه سخنة، ونفردها على الوجه، ونبدأ نضغط شوية على مناطق الحبوب، وبنسيب الماسك على بشرتنا لمدة ساعة، وبعد كده نغسل وشنا كويس.. والماسك ده ممكن نعمله مرتين في الأسبوع. كمان أنا نصحت قبل كده أي حد بيعاني من مشكلة الحبوب، إنه يستخدم صابون بيحتوي على نسبة من الطمي، ومن أنواع الصابون ده "أدورا" و"لمبادا". * هل بذر القطون بيعالج الحبوب وللا للهالات السوداء؟! أنا قلت قبل كده إن بذر القَطّون فيه منه نوعين: البلدي والمستورد، والبلدي أفضل وبيكون أغمق وأصغر. وقولنا إننا بنحطه من بالليل للصبح في ميه سخنة، وبناخد المية دي ونحطّها على المنطقة اللي فوق وتحت العيون، والجل اللي بنحصل عليه ده بيعمل على إزالة الخطوط الرفيعة والهالات السوداء، ولو فيه حبوب بيشيلها، يعني بيعالج الاتنين. وإحنا طبعاً بنحتفظ به في الثلاجة، وعند الاستعمال بنطلّعه من الثلاجة وناخد الكمية اللي إحنا عايزينها (بالملعقة مش بإيدينا) وبعد كده نحطه تاني في الثلاجة. * يا ريت تقولي لنا ممكن نستعمل أي نوع حمام كريم في ماسك حمام الكريم بالعسل اللي عملتيه في الحلقات اللي فاتت؟! ممكن نستخدم أي نوع حمام كريم يليق مع نوع شعرك، لكن بشرط إننا لما نيجي نوزع الماسك نحط الكمية الأكبر من العسل على جذور الشعر، أما باقي الشعر فبنوزع عليه باقي حمام الكريم؛ لأن العسل مفيد جداً لكن بينشف الشعر شوية، لكن إحنا بنحتاجه على الجذور علشان يغذيها، ويشيل الفطريات والقشرة الخفيفة اللي بتكون موجودة على فروة الرأس.
إضغط لمشاهدة الفيديو:
* إيه الماسكات الطبيعية اللي ممكن نعملها لتفتيح المناطق الحساسة؟! أهم حاجة للتغلب على المشكلة دي هي النظافة الشخصية، يعني إننا نستخدم الليفة يومياً، والليفة المغربية من مرة لمرتين في الأسبوع؛ لأن كثرة استخدام الليفة على الجسم -وخصوصا بالليل- بتزيل منه طبقات الجلد الميت. يعني لازم بعد ما نرجع البيت ناخد شاور، ونركز بالليفة على المناطق الغامقة، وبعد الحمام ممكن نستخدم ماسكات أو كريمات ترطيب. وبالنسبة للاسمرار اللي بيكون في منطقة الكوع والركبتين؛ فإحنا قلنا في حلقة قبل كده ماسك الزنجبيل وده بجد مفيد جداً لتفتيح المناطق دي. وتاني عايزة أؤكّد على أهمية وضرورة الاهتمام بالنظافة الشخصية... ودي بعض أساسيات النظافة الشخصية اللي لازم ناخد بالنا منها: 1- لازم ناخد شاور مرتين في اليوم؛ أول ما نصحى الصبح، وقبل ما ننام بالليل.. وبعد الشاور الليلي لازم نستخدم مرطبات ومغذيات للبشرة. 2- لازم نغير ملايات السرير يومياً، ولو مش هنقدر نعمل كده يبقى على الأقل نغير أكياس المخدة، وكمان الفوطة الشخصية لازم تتغير يومياً علشان نتجنب ظهور الحبوب. 3- لازم نلبس ملابس نظيفة دايماً، يعني ماينفعش إننا نلبس حاجة كنا لبسناها مرة قبل كده، وخاصة قطع الملابس اللي بتكون ملاصقة للجسم. ودي كانت بعض النصائح البسيطة اللي ممكن نعملها علشان نحافظ على بشرتنا من المشكلات، ونحافظ على شكلها صحي وفيه نضارة لفترة طويلة. وصدقيني لما تعوّدي نفسك على الحاجات دي؛ هتحسي بثقة عالية في نفسك، وهيبقى ده أسلوب حياتك بعد كده.
إضغط لمشاهدة الفيديو:
* إزاي يا رانيا نعمل حمام للقدمين كل يوم، مش كده البشرة هتتأثر؟! حمام القدمين اليومي مفيد جداً للناس اللي بتعاني من تشققات كتيرة أوي في المنطقة دي، لأنه بيساعد على إن الشقوق دي تتقفل، وخاصة مع استخدام المرطِبات (زي الجلسرين والليمون والكريمات) بعد حمام القدمين.
إضغط لمشاهدة الفيديو:
وبكده تكون خلصت حلقتنا النهارده... وأتمنى أكون قدرت أجاوب على جزء كبير من أسئلتكم... وتابعوني في الحلقات الجاية... وفي انتظار تعليقاتكم وأسئلتكم،،،
