أعدّه للنشر: آية أشرف العيد خلاص على الأبواب والعزومات واللّمة بتحلى ودايما بتحبي تظهري طاولة طعامك مفيش زيها وده طبعا بيكون بالنسبة للأكل الل هتقدميه على الطاولة.. لكن فكرتي قبل كدة إنك ترتبي طاولة الطعام بحيث إن شكلها يكون جذاب ومرتب، لأن العين بتاكل قبل الفم، ولإن ترتيب السفرة يعتبر فن في حد ذاته، النهاردة معانا في "لايف ستايل" هنعرفك إزاي تخلّي سفرتك مفيش زيّها من حيث التتنسيق والأناقة والإتيكيت. 1- ترتيب الأطباق الأطباق اللي بناكل فيها طبعا بيكون مقاساتها وأشكالها مختلفة، لكن الطبق الرئيسي بيكون أكبر طبق، فراعي إنك تحطيه في متناول الضيف بحيث إنه يكون مش قريب أوي ولا بعيد، وبالنسبة لطبق الشوربة حطيه على الطبق الرئيسي علشان ضيفك يبدأ به الأكل. 2- الشوك والملاعق والسكاكين علي جهة اليمين حطي السكينة وملعقة الطعام، وعلى الشمال حطي الشوكة، أما عند نهاية الطبق من الجهة العليا حطي الشوكة الصغيرة وممكن كمان تحطي الملعقة صغيرة المخصصين لتناول الحلو أو السلطة أو حطي الشوكة الصغيرة على الشمال إلى جانب الشوكة الكبيرة. 3- الأكواب احرصي دايما إنه يكون بجانب كل طبق 2 كوب واحد للماء والتاني للعصير، وحطيهم في أعلى جهة اليمين، ورتبيهم على حسب الحجم يعني من الأقصر للأطول. 4- فوطة المائدة علشان تكمل أناقة طاولتك، لازم يكون بجانب كل طبق رئيسي فوطة صغيرة للطعام، واحرصي إنك تحطيها على الجانب الأيسر من الطبق أو لو مفيش طبق شوربة ممكن تحطيها بشكل مرتب ومنسق فوق الطبق الرئيسي. 5- ديكور الطاولة الخطأ الشائع عند ترتيب طاولة الطعام إنك تحطي ديكور عالي في منتصف الطاولة، لأنك بالطريقة ديه هتزعجي الضيوف وهتحجبي عنهم الرؤية، لكن ممكن تحطي زهرية ورد بسيطة وقصيرة أو عدد بسيط من الشموع. وبكدة بيكون خلص موضوعنا.. يا رب تكونوا استفدتم ومستنيين آرائكم..