- مساء الخير.. قهوة الملحدين؟ - آه.. هنا قهوة الملحدين.. اقعد. - ماعلش أصل أنا ملحد جديد، وقالولى آجى هنا عشان أتأسس فى الإلحاد. - بيتك ومطرحك.. بس لازم تفتح مخك معانا وما تغلطش. - إن شاء الله. - شوف؟ آديك من أولها هتغلط.. يا عم احنا ملحدين. - أيوا يعنى هنا ممكن نشوف أبو لهب وأبو جهل بقى.. هاهاهاها. - أهو بتقل دمك ده ممكن ما تتقبلش. - طيب المفروض أعمل إيه بقى عشان ابقى ملحد محترم؟ - شوف.. ما تتعاملش غير مع ملحدين.. يعنى هتلاقى ع الناصية سنترال الملحدين والدقيقة أرخص عشان سارقين الخطوط.. ما هم كفرة بقى.. وعلى يمينك هتلاقى مطعم الملحدين، ودول بيغسلوا الأكل وهما بيقروا صلاة بوذا، ولو عايز تشترى سجاير ما تروحش لكشك عادل عشان معلق صورة عليها قرآن، ولا تروح لمحل جرجس عشان معلق صورة المسيح.. روح لكشك كريستوفر ده تبعنا. - اشمعنى؟ هوا معلق صورة إيه؟ - يا عم باقولك الراجل كَفَر.. معلق صورة مراتُه طبعا. - طب ثوانى أطلب حاجة ونكمل الدرس.. يا برنس، هاتلى شيشة تفاح ربنا يكرمك. - شفت؟ آديك بتغلط تانى.. يا عم انت ملحد.. مافيش ربنا يكرمك. - أمال اعمل إيه؟ أسبّ له الدين؟ - ما هو القهوجى ملحد مالهوش دين برضه. شوف.. لما تحب تطيّب خاطره احلف عليه بالطبيعة. - سهلة دى.. يا برنس، هاتلى شيشة تفاح وحياة غابات السافانا. - تعجبنى. - بس أنا سمعت أن الحكومة قفلت قهوة ملحدين تانية من كام يوم.. انتو اتصرفتو ازاى؟ - يا عم ما احنا من كام يوم كنا موحدين بالله.. سمعنا ان الحكومة بتقضى ع الإلحاد بقفل القهاوى.. شدينا ف شعرنا وكفرنا كلنا.