المجد للبنات

* تحية لكل بنت بتختار شريك حياتها بقلبها وعقلها (لو اختارت بقلبها بس هتكسره ولو اختارت بعقلها بس يبقى هتظلم نفسها).
*تحية لكل بنت مش هتموت على مهند وكريم وتيمو (دمهم تقيل اصلا).
*تحية لكل بنت مش سلبية وبتعرف تاخد حقها لو حد قربلها فى الشارع (السلبية بتخلى اى ظاهرة تتفاقم).
* تحية لكل بنت مش لحوحة ومش بتزن (نادرا على فكرة لما بتلاقى بنت معندهاش الطبع ده).
* تحية لكل بنت مش بتحط كيلو ميك اب على وشها (لدرجة أن بتبذل مجهود عشان تعرف هى مين).
* تحية لكل بنت صوتها مش عالى فى الشارع (فى بنات ممكن تسمعهم على بعد أميال).
* تحية لكل بنت مش بتلف شعرها هدية (فى بنات بتلبس حجاب فتحس لما تشوفها انها شبه النعامة).
* تحية لكل بنت مبتقولش (مش عارفة - مش هينفع -..) مالها مينفعش - معرفش ؟
* تحية لكل بنت واثقة فى نفسها ومتبصش لاى بنت غيرها (كل بنت وفيها حاجة حلوة)
* تحية لكل بنت بتتكلم فى الموبيل بصوت واطى فى المواصلات (مش لازم كل الركاب يعرفوا قصة حياتها)
* تحية لكل بنت مبتشتمش لمجرد تثبت انها بنت كوول (فى بنات بقت بتشتم أكتر من الأولاد الأيام دى).
* تحية لكل بنت عارفة ازاى تكون أنثى رقيقة (وده مش بالتكلف ولا بالدلع دى طبيعة على فكرة).
* تحية لكل بنت لما اتخطبت متغيرتش مع أصحابها (غالبا بتبقى فاكرة ان أصحابها هيحسدوها وهيعملولها مشاكل).
* تحية لكل بنت عنده هواية مفيدة (غير طبعا برامج الميك اب واخر أغنية نزلت ايه).
* تحية لكل بنت مبتلبسش سكينى وفيزون (موضة الأيام دى ومش شيك على فكرة).
* تحية لكل بنت محجبة مش بتطلع اوصة من الحجاب (عرفنا ان شعرك حلو بس المنظر مش حلو).
* تحية لكل بنت عندها طموح وعارفة هى عايزة ايه (حتى و هتقعد فى البيت وتربى أولادها تربية سليمة فده فى حد ذاته هدف).
* تحية لكل بنت مبتنزلش من بيتها واكنها محل اكسسورات متنقل (الجمال فى البساطة).
* تحية لكل بنت معندهاش صاحب ولد انتيم (البنات مخلصوش على فكرة).
* تحية لكل بنت علاقتها باخوها علاقة اخوة بجد (مش مجرد اتنين عايشين فى بيت واحد وليهم نفس اسم الأب فى البطاقة).
* تحية لكل بنت عندها الارتباط يا دبلة فى اليمين او فى الشمال (مش أصحاب على ما تفرج).
* تحية لكل بنت مش مسترجلة (الحلو فيكى أنك بنت مش انك بتتصرفى زى الأولاد).
*تحية لكل بنت بتعامل حماتها على انها والدتها أو على الأقل فى مقام والدتها (حماتك مش عدوتك وأنتى مش فى حرب).
تحية من القلب لكل بنت مصرية فيها الصفات دى أو على الأقل فيها من الصفات دى وبتحاول تبقى أحسن وأحسن.
* كتبتها: رنا عبد الحكيم خريجة كليه الألسن وتعمل مديرة للاستيراد فى إحدى الشركات الخاصة وتعشق الكتابة وتهوى التدوين ولها مدونة باللغة العربية.