«أهلى يتدخلون أحيانا فى حياتى وبعض التفاصيل تبدو لهم مهمة جدا.. فى الغالب يسألون ويتدخلون بدافع الخوف لا الفضول وفكرة المعرفة للمعرفة والسؤال لمجرد السؤال غير موجودة فى بيتنا.. لكن بعض الأشخاص يحاولون اقتحام حياتى الخاصة دون مبرر» تحكى هبة «25 سنة»، الطالبة بكلية الطب، عن أولى خبراتها مع «المواطن البراشوط» قائلة: «كنت عائدة من السفر، ركبت الباص وجلس شخص غريب بجوارى.. وفجأة ودون أن أعرفه وجدته يسألنى عن اسمى وسنى ودراستى ومكان إقامتى.. حاولت أن أمنعه من التطفل واقتحام حياتى لكنه كان مصرا بشكل غريب وكأن من حقه أن يعرف كل شىء عنى وحين فشلت فى إسكاته تركت له المقعد فهؤلاء الطفوليون لا حل لهم سوى الابتعاد». أما سلمى، الطالبة بكلية الاقتصاد والعلوم السياسية، فلها حكاية أخرى «أنا شوفت من النوعية دى كتير.. فيه ناس كده يبقوا معارف من بعيد لبعيد مش حد أنتيم يعنى.. تلاقى الواحد أو الواحدة منهم بتتكلم فى مواضيع حساسة جدا.. وتلاقى الفضولى مصر إنه يعرف كل حاجة وبالتفصيل الممل.. كنت بلاقى أسئلة عن كل شىء لبسى وشكلى وعلاقاتى بالناس.. حاجة مملة. فى الآخر عرفت إن النوعية دى الواحد لازم يتعامل معاها بذكاء.. بقيت لما أصادف حد منهم أقصر معاه.. لا أجاوبه مش بفتح معاه أى مواضيع». «كل الناس بتتدخل فى حياتى» هكذا بدأت رنا الطالبة بكلية الصيدلة حكايتها مع الخصوصية الضائعة: «أهلى يتدخلون بشكل مبالغ فيه.. هايجننونى بالأسئلة: كنتى فين؟ ومع مين؟ وعملتوا إيه؟ ومين صاحبتك دى؟ وليه تصاحبيها؟ وليه فلانة مش فلانة؟ واتكلمتوا فى إيه؟ وليه تتكلموا فى الحاجات دى؟ ومين سمعكم وإنتو بتتكلموا؟ وليه بتحبوا الأغنية دى؟ وليه بتشوفوا الفيلم ده.. حاجة مملة بجد.. واللى زاد وغطى إنى بلاقى أصحاب بيعملوا كده بردو بس لما بعرف إن فيه حد عنده المشكلة دى بعامله بحرص.. ومرة كنت فى مارينا، وفوجئت بست وقفت قدامى وقعدت تنتقد مكياجى ولبسى بشكل مهين جدا.. الغريب إنها رغم انتقاداتها دى كانت لابسة تقريبا من غير هدوم.. الناس اتجننت فعلا». أما إيهاب «26 سنة» فيرى أن المشكلة «فى الفضول.. إحنا شعب فضولى جدا.. وساعات كنت ألاقى ناس من النوعية دى قدامى وفجأة ألاقى أسئلة سخيفة مثلا: أنت تعرفت على مراتك إزاى؟ لماذا لم تنجبوا حتى الآن؟ شقتكم إيجار ولا تمليك؟ ومرتبك كام؟ يا حرام بيكفيك؟ ولا الأهل بيساعدوا؟» الأسئلة التى تحاصر إيهاب لا تمنعه من الرد بدبلوماسية على المتطفلين «الفكرة إننا عاوزين مساحة نتنفس فيها.. لازم يبقى فيه space لكل واحد اللى بيحصل دا حرام فعلا، وأنا ومراتى اتفقنا إننا نبعد الناس عن أى نقاش بينا إلا إذا احتجنا مشورة الأهل مثلا». ندى فتاة فى العشرينيات تخرجت والتحقت بوظيفة بسيطة، لكن من قال إن السن الصغيرة تمنع التطفل «الجيران والأقارب جننونى.. كل شوية أتحاصر بأسئلة سخيفة ألاقى واحدة بتسألنى فجأة: إنتى لسه ما حدش خطبك؟ وليه دا إنتى حلوة؟ طيب ما تلبسى حجاب؟ إنتى بتصلى؟ وفى الشغل زملائى يتدخلون فى كل شىء أفعله.. بحس إن فيه 100 عين بتراقبنى فى كل حركة فعلا». هانى عبده، موظف بسيط فى أحد الفنادق الكبرى، كان عليه هو الآخر أن يكتشف الحياة دون خصوصية «الناس كلها بتتدخل فى أدق التفاصيل.. لما بكلم مراتى بأبقى حاسس إن الشارع كله رامى ودانه، ولو جبت هدية ولا أكلة حلوة ولا حاجة للبيت الناس كلها بتعرف منين الله أعلم» ويتابع هانى «مثلا مرة كنت ماشى فى الشارع ولابس جاكيت جديد لسه مشتريه من أسبوع فوجئت بواحد ما أعرفوش قعد يسألنى: إنت جبته منين؟ وبكام؟ ويا ترى فيه منه ألوان؟ طب تفتكر ألاقى مقاسى؟ معاك رقم المحل؟ هو محل كبير ماركات يعنى ولا إيه؟ طب لو رحت هناك أعرف أجيب طقم كامل ولا جواكت بس؟ أنا ذهلت من كمية الأسئلة وأعتقد دا نتيجة حرمان من الأهل أو إحساس بعدم الأمان أو تربية مش سليمة بس هأقول إيه الناس كلها بقت كده ربنا يستر الواحد فعلا ما بقاش عارف يعيش فى الحياة من غير ما يفضل يجاوب على أسئلة المتطفلين اللى بيلاقيهم فى كل مكان». بخلاف الآراء السابقة ترى سارة «23 سنة» الطالبة بإحدى الجامعات الخاصة، أن الفضوليين ليسوا مشكلة «إحنا بنلوم الناس من غير سبب مقنع، نقعد نقول عنهم صفات وحشة ونذم فيهم، وكأننا ملايكة ما بنعملش زيهم.. ده اسمه ظلم بجد.. كلنا بنعمل كده.. المسألة حب استطلاع.. فضول.. عشم مش أكتر. الدنيا ما اتهدتش يعنى لما يشدنى حوار بين اثنين قاعدين جنبى فأتابعهم بالصدفة وأسمع الحوار.. ما حصلش حاجة يعنى».
