قال الفنان خالد أبوالنجا إن عزاء شقيقته سلوى أبوالنجا سيقام في دار المناسبات مسجد عمر بن عبدالعزيز بجوار نادي هليوبوليس غداً الخميس، وذلك بعد صلاة المغرب. كما رثا أبو النجا شقيقته بكلمات مؤثرة عبر مدونته الشخصية على الإنترنت، قائلًا: "سلوى أختي أجمل بنت في مصر، البقية في حياتكم كنت في مطار اليونان لما كلمني طارق أخويا وقال لي الحق يا خالد سلوى يا خالد سلوى أختنا خطفها حريق النهاردة لما رجعت بنفسها داخل الحريق بيقولوا في محاولة عشان تنقذ قططها". وأضاف: "كإنه أمبارح لما كنت "دودي" أخوها الصغنن اللي كانت سلوى بتجيبه يتفرج على تدريباتها أو ماتشاتها في الباسكت والهاندبول في نادي هليوبوليس أو تاخده معاها مع الفريق في سفريات حول العالم كنت أخوها الصغنن اللي ماحدش يعرفه وكنت باسمع كل التعليقات اللي بتحسدها علي جمالها وحبها والتزامها الرياضي، دايما فخور بيها زي كل اخواتي الكبار كلهم فخور بيهم كلهم رياضيين كلهم جمال كلهم يشرفوا مصر كلها وغالبا كانوا السبب إن أنا كمان حبيت أكون زيهم، سلوي أبوالنجا بطلة الهاندبول والباسكيت أجمل واحدة شفتها في حياتي اتخطفت". تابع أبو النجا: "مش بس الموت اللي بيخطف، الاكتئاب بيخطف، بيخطف عشان الناس بتخذلنا فبنوصل لدرجة إن مافيش بكرة نصحى له، الحزن بيخطف، الحزن بيخطف عشان بنحب ناس بيتغيروا وبيبقوا ناس تانيين! الحزن بيخطف عشان بيحبنا ناس زي ما كنا في يوم بس إحنا بنتغير وبنكبر و ماحناش زي ما إحنا اللي حبوهم! الندم بيخطف، الندم علي قرارات في حياتنا لو ماتصالحناش معاها بيخطفنا، حياتنا بتتخطف مننا بالتدريج، كده في لحظة... كل الوقت... كل العمر.. كله بيخلص!". أما عن الحريق فقال أبو النجا: "حريق في بلكون الشقة يوم 20 يوليو 2015 الساعة 4 العصر تقريبا، نجلا وسلوى لما اكتشفوا الحريق وحاولوا السيطرة عليه فتحوا باب ليمتد الحريق للشقة كلها للأسف، وبعد ما تنقذ سلوى و نجلا، لكن ترجع سلوى للحريق باين عشان تنقذ قططها فتختنق سلوى من دخان الحريق مع القطط". وتابع: "مش بس الاختناق اللي خطف سلوى، ولا بس القطط، ولا بس الاكتئاب، ولا بس الندم، ولا بس الحزن، ولا بس الثورة، ولا بس الدين والعسكر اللي خطف سلوى مننا كلنا، غالبا الخوف! الخوف على القطط اللي بقت أهلها، الخوف من بكرة بلا أمل، الخوف من الناس اللي بلا قلب". واختتم أبو النجا رثاؤه لشقيقته: "سلوى أختي سامعها بتقول يا دودي ماتزعلوش أنا باحبك يا دودي، باحبكم كلكم القطط ونجلا وسيوفه وطروقة وهشومة وسمسمه وكوووولكم.. وبطل موضوع الخطف ده يا ولد، أنا مع مامي وهانبعت لكم من الجنه حضن وبوسة كل يوم بدل الصور اللي كنت بابعتها لكم كل يوم وادوشكم بيها، بس عندك حق يا دقدق مش قادرة أقول هتوحشوني عشان كنتم واحشيني أصلا، خلوا بالكوا من بعض مالكوش غير بعض مامي قالتها واديني أنا كمان أهو باقولها.. باحبكوا". يذكر أن أخت الفنان خالد أبوالنجا شيعت جنازتها أمس الثلاثاء بعدما وافتها المنية جراء حريق في شقتها بمنطقة الزمالك.
