نعى الفنان خالد أبو النجا شقيقته سلوي، التي شيعت جنازتها ظهر اليوم، ووصف أبو النجا شقيقته الراحلة ب"أجمل واحدة في مصر"، ونشر عدة صور لشقيقته الراحلة. وكتب أبو النجا تغريدة على تويتر "أختي الحبيبة سلوى أبو النجا..أجمل واحدة في مصر.. تعيشوا انتوا.. البقاء لله.. البقاء للحب.." وكتب عنها عبر مدونته "سلوى...أختي... أجمل بنت في مصر... البقية في حياتكم...كنت في مطار اليونان لما كلمني طارق أخويا وقال لي الحق يا خالد.. سلوى يا خالد.. سلوى أختنا.. خطفها حريق النهاردة.. لما رجعت بنفسها داخل الحريق.. بيقولوا في محاولة عشان تنقذ قططها.. امبارح لما كنت "دودي" أخوها الصغنن اللي كانت سلوي بتجيبه يتفرج على تدريباتها أو ماتشاتها في الباسكت والهاندبول في نادي هليوبوليس أو تاخده معاها مع الفريق في سفريات حول العالم كنت أخوها الصغنن اللي ما حدش يعرفه وكنت باسمع كل التعليقات اللي بتحسدها على جمالها وحبها والتزامها الرياضي دايمًا فخور بيها زي كل إخواتي الكبار كلهم... فخور بيهم... كلهم رياضيين.. كلهم جمال..كلهم يشرفوا مصر كلها.. وغالبا كانوا السبب إن أنا كمان حبيت أكون زيهم..". وكتب أبو النجا " سلوى أبو النجا.. بطلة الهاندبول والباسكيت...أجمل واحدة شفتها في حياتي... اتخطفت... مش بس الموت اللي بيخطف.. الاكتئاب بيخطف بيخطف عشان الناس بتخذلنا فبنوصل لدرجة إن ما فيش بكرة نصحي له الحزن بيخطف الحزن بيخطف عشان بنحب ناس بيتغيروا وبيبقوا ناس تانيين!" وقال "الحزن بيخطف عشان بيحبنا ناس زي ما كنا في يوم بس إحنا بنتغير وبنكبر وماحناش زي ما إحنا اللي حبوهم! الندم بيخطف الندم على قرارات في حياتنا لو ماتصالحناش معاها بيخطفنا الثورة بتخطف.. وبتتخطف.. واللي بيخطفوها بيحاولوا يخطفونا باسم الدين مرة وباسم العسكر مرة حياتنا بتتخطف مننا... بالتدريج... كده في لحظة... كل الوقت... كل العمر.. كله بيخلص! فجأة"... وأضاف أبو النجا "حريق في بلكونة الشقة يوم 20 يوليو 2015 الساعه 4 العصر تقريبا.. نجلا وسلوى لما اكتشفا الحريق وحاولا السيطرة عليه فتحا بابا ليمتد الحريق للشقة كلها للأسف.. وبعد ما تنقذ سلوى ونجلا لكن ترجع سلوى للحريق باين عشان تنقذ قططها فتختنق سلوى من دخان الحريق مع القطط. بس مش بس الاختناق اللي خطف سلوى ولا بس القطط ولا بس الاكتئاب ولا بس الندم ولا بس الحزن ولا بس الثورة ولا بس الدين والعسكر اللي خطف سلوى مننا كلنا غالبًا الخوف!". وقال "سلوى أختي سامعها بتقول.. يا دودي.. ما تزعلوش... أنا بحبك يا دودي:) ... بحبكم كلكم القطط ونجلا وسيوفه وطروقة وهشومة وسمسمة وكوووولكم.. وبطل موضوع الخطف ده يا ولد أنا مع مامي... وها نبعت لكم من الجنة حضن وبوسة كل يوم بدل الصور اللي كنت بابعتها لكم كل يوم وأدوشكم بيها.. بس عندك حق يا دقدق... مش قادرة أقول هتوحشوني.. عشان كنتم واحشيني أصلًا.. خلوا بالكوا من بعض.. مالكوش غير بعض.. مامي قالتها.. وأديني أنا كمان أهو باقولها.. باحبكوا".
