شباب الفيس بوك وتويتر يهاجمون تصريحات "موسى" ويطالبون"البرادعي" بالنزول للتحرير محيط - محمد يونس عمرو موسى و البرادعي اثارت تصريحات كلا من مرشحي الرئاسة القادمين، " عمرو موسى " و " محمد البرادعي " ، حفيظة وجدل شباب وزوار ابرز مواقع التواصل الاجتماعي " فيس بوك" و" تويتر" ،
وذلك عقب احداث التحرير الليلة الماضية والتي امتدت لصباح اليوم الاربعاء ومازالت مستمرة، وسقط على اثرها اكثر من 900 مصاب حتى الان.
وهاجم الزوار على تويتر والفيس بوك تصريحات موسى ووصفوه بانه يختار الاوقات الحرجة للحديث وانه اختار مدخل الشهداء ليكسب تعاطف الناس معتبرين اياه احد فلول النظام السابق.
اما ردة فعل الزوار على تصريحات البرادعي فكانت متباينة وطالبته بالتواصل اكثر مع الشعب والنزول للشارع وليس التحدث عبر حسابه على التويتر، كما طالبوه بالجلوس مع الاحزاب و الجمعيات لتقييم الامور والوقوف على حلول.
ولتتضح الرؤية اكثر رصدنا ابرز تعليقات الشباب على الفيس بوك وتويتر عقب اطلاق تلك التصريحات، فكانت الردود على عمرو موسى اولا.
عمرو موسى حيث قال موسى على حسابه الشخصي على تويتر " ادعو الجميع الى الحفاظ على استقرار مصر وهيبتها و ثورتها، و فى النهاية، لا يصح ان يضيع دم الشهداء هدرا ".
بينما قال في التويتة الثانية " يجب حماية هذه الأسر الكريمة من إعتداء الفلول و المخربين، أدعو إلى تأييد حكاما و محكومين، حكومة و شعبا للثوار و شهدائهم ".
وقال في تويتة ثالثة " تكريم الشهداء واجب على كل مصري و أسر الشهداء تتطلع إلى تعاطفنا نحن المصريين وهو أيضاً واجب علينا ".
وكانت ردود الافعال كالتالي :
- يا شيخ تنقطنا بسكاتك انت وكل إللي زيك، لو مش حتقف جنب الغلابة وتنصفهم يبقى تسكت أحسن.
- ياموسى اسكت لانك رقم واحد فلول.
- بطل كلام وروح لصاحبك وحبيبك في شرم مستنيك هناك اللي زيك يروح يعتكف بقى ده لو مرحش السجن او اتعدم يعني.
- طب ماتنزل تأيدهم في التحرير ولا انت كلام وهوا كلام .
- تعاطف ايه اللي انتا عايزو بس .. اسر الشهداء عايزين حق دماء اولادهم .. حد يقوله حاجة يا جدعان.
- يعجبني فيك حسن إختيارك الاوقات اللي تحاول تخدع فيها الناس وتضحك على عقولها بدخولك من ناحية الشهداء.
- اللي ما يخدش موقف دلوقتي يبقى ميلزمناش يا دبلوماسي.
- نفس السياسة العائمة تستخدمها في كل المواقف وسياسة مسك العصاه من المنتصف.
محمد البرادعي بينما صرح البرادعي ايضا على حسابه الشخصي على تويتر قائلا " أن المصداقية بدأت تتآكل مع التباطؤ والضبابية والارتباك.. مطلوب رؤية واضحة وشفافية وجدول زمني ومشاركة حقيقية ".
وفي تويتة ثانية قال البرادعي: " أطالب المجلس العسكري على وجه السرعة بتوضيح الحقائق وأولها أسباب و ملابسات إستخدام العنف و إتخاذ الإجراءات الضرورية لإنهائه".
وبالتالي تعاقبت ردود الافعال كما يلي :
- يادكتور انزل للشباب بنفسك وتعرف على اسباب وملابسات نزولهم وحقيقة ما جرى ولا تنتظر توضيحات من احد.
- نرجو منك التواجد في التحرير و الشارع من الان لانه امر اساسي ومطلب جماهيري.
- من فضلك كن المبادر ولا تكن الناصح فقط بالجلوس مع الاحزاب و الجمعيات للوصول الى الافضل.
- انت عايزها هيصة علشان توصل.. نجوم السما اقرب ليك مصر اكبر منك.
- كل انصار البرادعي والى البرادعي نفسه.. جه الوقت اللى التحرير محتاج ليك... يا ترى سيادة معاليك مستني ايه؟؟ الجو مش حر وابقي شغل تكييف العربية والزجاج مفتوح مش مشكلة.
- يا برادعى الجدول الزمنى موجود فى الاعلان الدستورى ثم ان اللى بيحصل فى التحرير ده ملوش علاقة بالجدول الزمنى... بلاش ضحك على الدقون.
- البرادعى عنده مخطط لخراب مصر.. واحنا مش معاه ولا مع انصاره الجهلة.
- انت فين ياللى مفروض انك من الشعب، يوم الثورة كان بيعمل اللقاءات من حديقة فيلته والناس بتتهرس فى الميدان، لو عايز تحكمنا شاركنا وابقى مع الناس فى الشارع.
- الراجل ده مش عارف عايز ايه ؟نجيبله شعب من سويسرا يعني؟!!
- البرادعى فاكر نفسه لسه فى هيئه الطاقة وجاي مصر علشان يفتش علينا وبرضه بأوامر من أمريكا.
- الصفة المشتركة بين المرشحين للرئاسة هي فلسفة صياغة العبارات.
- طب سؤال يا برادعي ان شاء الله كده لو بقيت رئيس مصر هتتواصل مع الفلاحين والعمال ازاي وهما معندهومش حسابات علي تويتر ومش هيعرفو يبعتولك شكاوي؟!!
