نفخ عبده شمة بصوت عالٍ وهو يقول: - خبر إيه امال يا ولاد. آدي الزمن اللي وصي عليه حسان اليماني. وضحك أحمد القزعة وقال: - إنت يا ابني بتجيب العالم دي منين الله يخرب بيتك يا غيبوبة! فلم يعره عبده شمة اهتماماً ووجه حديثه لي: - الراجل المعفن سرج جرشينات الزلزال: يصح الكلام ده؟ قلت له: - وما خفي كان أعظم يا حاج عبده. فقال أحمد القزعة: - هي لسه فيها ما خفي. قلت: - لسه كثير يا قزعة دول ثلاثين سن سرقة في سرقة. فقال عبده شمه ضاحكا: -وهما ما كانوش بيعملوا حاجة غير السرجة وبس؟ فقال أحمد القزعة: - وهي دي شوية يا غيبوبة؟ فقال عبده شمه: - وهو البنك المركزي ده ما عليهوش رقابة؟ قلت: - والله دا سؤال مهم: إزاي الوعاء اللي فيه احتياطي مصر من النقد الأجنبي يبقي السايب في السايب كده تقدر تقول لي يا قزعة ازاي الكلام ده؟ وضحك أحمد القزعة وقال: - إنت ماسمعتش المثل اللي بيقول «مسكوا القط مفتاح الكرار». وضحك عبده شمه قائلا: - والله يحرج لك ناسك يا مكلوب انت.. الاكاده ان دمك خفيف يا ملعون. وفجأة قال أحمد القزعة: - إلا صحيح يا غيبوبة هما ليه ضربوا الطناش علي المليارات اللي هربوها برة؟ وقال عبده شمه: - وانا إيش دراني يا قزعة. فقال أحمد القزعة: - إنت ايش ادراك ازاي وانت عارف ابليس مخبي ابنه فين؟ فقال عبده شمه: - وي وي وي كنت حتلبسني مصيبة إياك. وضحك أحمد القزعة قائلا: - هو انا اللي ح البسك ما هي لابساك لابساك.. انت مش صعيدي؟ فقال عبده شمه: - صعيدي غصب عنك. وقال أحمد القزعة: - تبقي بلديات عبدالناصر وعبدالناصر جاب لنا السادات والسادات هو اللي جاب لنا شيخ المنسرده عرفت يا خبؤ؟ وضحكنا وقلت لأحمد القزعة: - طب ما انت نبيه أهه طب تعرف بقي تحل لنا فزورة الاحتفال بيوم 25 يناير الجاي؟ فقال أحمد القزعة: - وهي دي فزورة؟ قلت: - ايوه فزورة المجلس العسكري اللي قتل شباب الثورة وسحل البنات في الشارع عيني عينك يقرر اعتبار 25 يناير عيداً قومياً ويشارك في الاحتفال بيه مش دي تبقي فزورة؟ قال لي: - مش فاهم قلت له: - صاحب الفرح هو المقتول ولما بيجي القاتل يجامل في الفرح ويشوبش فيه تقدر تقول لي حينقط مين؟