بقلم : أحمد فؤاد نجم منذ 23 دقيقة 3 ثانية بدون مقدمات قال عبده شمه: - هبة يا عم أحمد.. البارحة كنا نتحدث عن قناة الأهلي وما كملناش. قلت: - كنا بنتكلم عن اعلام ما بعد ثورة 25 يناير بشكل عام ضحك أحمد القزعة. قائلا: - غيبوبة بيسمع اللي هو عايز يسمعه بس زي أمي. فقال عبده شمه: - والله يا أخي أمك دي خسارة فيك. فقال أحمد القزعة: - أيوه بقي قول كده وانت بقي عينك علي الحاجة لكن دا بعينك. وضحك عبده شمه قائلا: - وي وي وي وي الله يحرجهم لك يا مذهب الكلب. يا واد استحي عيب جبر يلمك. فقال أحمد القزعة: - وعيب ليه يا غيبوبة مش علي سنة الله ورسوله؟ ولا أنت ناوي تضرب ورقتين عرفي؟ وتحول عبده شمه إلي طفل وهو يقول: - وه وه وه ياد استحي وخلينا في اللي احنا فيه. قلت: - خلينا في اللي احنا فيه اللي هو موقف مجلس ادارة حسن حمدي والخطيب من شباب الألتراس مش كده يا حاج عبده . قال عبده شمه: - كده يا عم أحمد.. إيه العبارة وكيف الشباب دول يتخلوا عن الفريج في ماتش إنبي. قلت: لأن مجلس الادارة تخلي عنهم في ماتش كيما اسوان وصدقني يا حاج عبده لو المرحوم صالح سليم موجود ماكانش الموقف انتهي علي ما هو عليه. وتساءل عبده شمه: - وهو فيه فرج بين المرحوم صالح سليم وبين حسن حمدي والخطيب؟ فقال أحمد القزعة: - زي الفرق بين السما والارض يا غيبوبة. وقال عبده شمه: - فرج في إيه يعني يا واكل ابوك انت؟ قلت: - فرق في الانتماء يا حاج عبده. قال: - كيف يعني فهمها لي دي؟ قلت: حسن حمدي والخطيب بيشتغلوا في البيزنس ووجودهما في النادي الاهلي جزء من هذا البيزنس. فقال عبده شمه: - كيف يعني! فقال أحمد القزعة: - برواز يعني؟ قلت: - الله ينور عليك .. عزوة يعني تمهد لهم الطريق في جميع العمليات والصفقات اللي أحيانا تقدر بالمليارات وكله في الكتم. فقال عبده شمه: - وي وي وي جول كده امال. قلت: - وأحنا اتفقنا ان اعظم وأغلي ما يملك النادي الأهلي هو جمهوره العظيم المنتشر في شتي أرجاء الدنيا. فقال أحمد القزعة لشمه: - فهمت يا خبؤ؟ اقطع دراعي لو كنت فهمت حرف واحد. ضحكت وقلت لأحمد القزعة: - اللي مش فاهم النهاردة يفهم بكرة ومن هنا لبكرة يحلها ألف حلال.