كشف الإعلامي سيف زاهر عن أن الساعات الماضية شهدت محاولات للوقيعة بين لاعبي الأهلي ومسؤولي النادي ومدربهم السويسري مارسيل كولر من خلال تصريحات المترجم السابق لكولر الدكتور خالد الجوادي. وقال سيف زاهر: «إمبارح حصل اتصال بيني وبين خالد بيبو للرد على ما ذكره خالد الجوادي، فقال لي أنا مش هخرج أرد بس أنا هحكي لك واطلع اكلم أنت، اه أنا كنت بسأل كولر كثير عشان استفاد منه وأعرف نظام الراجل عشان أظبط أموري عليه ويتماشى مع اللي أنا عايزه». اقرأ أيضًا: «لو كلامك صح طلع صورة العقد».. رد ناري من الأهلي على مترجم كولر وتابع سيف زاهر ناقلًا كلام بيبو: «أنا اللي مشاني إني خفت على النادي الأهلي، ولو أنا مش موجود كان ممكن ناس تاخد دور أكبر من دورهم منهم الأستاذ خالد الجوادي، وده كان الخلاف بيني وبينه إن الجوادي كان عايز ياخد مساحة أكبر من مساحته وإن كولر عايز كمان يدي له مساحة أكبر من مساحته وهذا لا يحدث في الأهلي». وأضاف خالد بيبو: «أنا مشيت عشان حطيت كل واحد في مساحته وخليت كل واحد يبص في ورقته، وأساسا كولر مش مقتنع إن حد يكون في منصب مدير الكرة، وده مش من وقتي أنا لأ من قبلي بكثير، كولر بيحب يعمل كل حاجة لوحده ومكانش ينفع نخش في صراع، فأنا مش هرد على أي شخص أنا لازلت متواجدا في النادي الأهلي وبالتالي ملتزم بقواعد النادي». وعلق سيف زاهر مضيفا: «خالد بيبو إمبارح، الجوادي ركّبه مسرح بكل صراحة، يعني قال بيبو بيكلم الراجل كثير وبيسأله في كل حاجة وصدر مشهد للناس إن بيبو ضعيف ورحل بسبب القصة دي زي ما امبارح اتباع الشناوي وغيره من اللاعبين». وأضاف سيف زاهر: «أنا عايز أقول الجوادي وغيره أوعى تلعب بين إدارة الأهلي ولاعيبتهم وجمهورهم، الحتة دي منطقة الغام هتفرقع في وشك، والمباراة اللي جاية للأهلي هتلاقي الجماهير بتهتف للشناوي عشان هما دول اللي في القلب مهما يحصل ومهما أكلمت انت».