في دعوى طلاق للضرر تنظرها محكمة الأسرة بالجيزة وقف الزوجان طرفا الدعوى يتبادلان الإتهامات أمام القاضي ويتهم كل منهما الآخر اتهامًا يكذب به ما يدعيه، في محاولة لحسم النزاع لصالحه، فتقضي المحكمة برفض دعوى الزوجة وينتصر الزوج، أو تقبلها وتنتصر المدعية وتحصل على ما طلبته من حقوق أوردتها في دعواها أمام محكمة الأسرة. قالت الزوجة مقيمة الدعوى أمام محكمة الأسرة: 3 سنين جواز وأنا في عذاب وما شوفتش يوم واحد حلو معاه، من أول يوم مشاكل وخناق على أتفه الأسباب، وتدخلات من أهله مش ممكن أي ست تقبلها أو تستحملها، وصلت لدرجة إن أمه وإخواته البنات بيختارولنا هنتغدى إيه ونتعشى إيه. محكمة الأسرة - صورة أرشيفية وأضافت أمام قاضي محكمة الأسرة: كل فلوسه بيديها لأهله وبيحاسبني على كل جنيه بصرفه في البيت، ولما كنت أعترض على اللي بيعمله ماكنتش بلاقي غير الخناق والإهانة والتجاوز وأحيانا محاولة التعدي عليا بالضرب. طلب القاضي رئيس محكمة الأسرة من الزوج المدعي عليه الرد على ما وجهته الزوجة من اتهامات له بسوء معاملتها وإهانتها، فرد الزوج: يا حضرة القاضي كل اللي بتقوله مراتي ده افترا ومش حقيقي. هو عيب إني أكون مرتبط بأهلي وبار بأمي وأبويا وإخواتي البنات ؟. أنا الابن الوحيد على 3 بنات، طول عمري بحس إني مسؤول عنهم لأني أكبرهم سنًا، وده السبب في إنهم مرتبطين بيها أوي، لكن مراتي من يوم ما اتجوزنا وهي بتحاول بكل الطرق تبعدني عن أهلي، وتعمل فجوة بيني وبينهم- وفقا لما قاله الزوج أمام محكمة الأسرة . خلافات زوجية تصل إلى محكمة الأسرة - صورة أرشيفية وأضاف الزوج أمام محكمة الأسرة: لو فيه حد غلطان ومحقوق للتاني فعلا يبقي هي مش أنا، هي اللي ضحكت عليا وغشتني وخبت عليا حاجات ماعرفتهاش غير بعد ما اتجوزنا.. مراتي كانت عاملة عملية ومركبة شرايح ومسامير بسبب حادثة عربية قبل جوازنا بخمس سنين وماعرفتش منها غير بالصدفة، وإن العملية دي أثرت على حركة رجلها بنسبة 20%. وكنت لما أسألها رجلك مالها مش بتمشي عليها كويس ليه تقولي أصلها مجزوعة وساعات تقولي دي الأربطة لحد ما قالتلي الحقيقة بعد ما اتجوزنا بسنة. ولما قولتلها كنتي مخبية عليا ليه، قالتلي خوفت تقولي إني فيه عيب ومانكملش مع بعض. وبعد سماع الزوجين أمام محكمة الأسرة انتهت الجلسة بتأجيل نظر القضية لسماع شهود الطرفين.
