بييجى رمضان ومعاه كمية مهولة من المسلسلات، لدرجة أن في مسلسلات مابتبقاش عارف أصلا إنها موجودة، وتكتشفها بعد رمضان بكام شهر كدا. المهم أن أغلب المسلسلات دى بيبقوا عايزين يوصلوا فكرة معينة، درس مستفاد يعنى أو aim أو أي حاجة تستنتجها بعد ما المسلسل يخلص. بغض النظر عن أن في مسلسلات مالهاش أي تلاتين لزمة، وأن المخرج والكاتب والمنتج والممثل وكل إلى بيشتغلوا فيه مابيبقوش فاهمين هما بيعملوا إيه أصلا ولا بيقدموا إيه، بس هي سبوبة وخلاص عايزين يستغلوا فرصة شهر رمضان في تقديم عمل تليفزيونى وياخدوا فلوس.. وأنت كمشاهد مابتحصلش على أي متعة أو فايدة.. بس ما علينا يعنى، خلى الناس تسترزق. المسلسلات التانية بقى بتتمحور حول 3 قصص لا رابع لها، أولا: الناس الفقيرة حياتهم أحسن من الناس الغنية. عزيزى المؤلف، أنت غلطان.. إحنا أصلا شعب فقير.. أكتر من 85% من الشعب فقير.. وغلابة وعلى أد حالهم..عايزة أقولك إنهم مش مرتاحين نفسيًا أوى كدا زى مانت فاكر وبتبين في مسلسلك العظيم..عندهم مشاكل كتير جدًا أصلها العجز المادى. الأب والأم بيبقوا بيفكروا ازاى يوفروا لولادهم أساسيات الحياة في وسط الغلاء دا كله. البنت بيجيلها فترة بتشوف أن الجواز هو المخرج الوحيد من حالتها دى، وأنها لازم تتجوز واحد غنى، على الأقل أغنى منها. الولد بيبقى عايز يتجوز بس مش عارف عشان مابيشتغلش، ولو بيشتغل فهو مش "مكون نفسه". الأب والأم والبنت والولد بيتعرضوا لضغوط باستمرار، وإحنا عارفين أن الغلط بياخد شكل "دى فرصة ماتتعوضش"، فأغلبهم بيعمل الغلط وهو فاكره فرصة، فحياتهم في الغالب بتدمر. وبالنسبة للطبقة الغنية، فهم مش زى مانت بتصورهم في المسلسل. Guess what، ولادهم مش فشلا وضايعين، بالعكس بيتعلموا كويس، وحياتهم الاجتماعية ممتازة..ماشى في منهم بيفشلوا أو بيضيعوا بس دا بيحصل في أي دايرة صحاب مهما كان مستواهم، أن الصاحب ساحب والحاجات دى.. الأب مش لازم يخون مراته مع السكرتيرة اللى في شركته، والأم مش دايما تافهة، أو كل وقتها في الجمعيات الخيرية عشان المظهر الاجتماعى، وعادي ممكن تكون بتشارك في الحاجات دى عشان هي عايزة تعمل خير فعلا.. وعلى فكرة الطبقة دي بيتجوزوا من بعض، مش زي ما بنشوف في الحلقات، أن الولد حب بنت مسكينة وفقيرة جدًا واتجوزها، والبنت هكذا، حبت واحد بيشتغل عند أبوها في المصنع واتحدت العالم عشان يتجوزوا، وبيتحوزوا فعلا والكلام دا.. عايزة كمان أقولك إن مش كل الأغنياء حرامية، أنا معاك أن أغلبهم حرامية بس مش كلهم.. المخرج والكاتب والعاملين على المسلسل بيبقوا عايزين يرضوا المشاهد الفقير، ويطبطبوا عليه كدا..بأسلوب ساذج جدًا.. إلى هو "شايف الأغنيا بيتخرب بيتهم إزاى؟..شايف الأغنيا عيشتهم مش مرتاحة إزاى؟..شايف ربنا غضبان عليهم إزاى؟! شايف بقى الفقرا مرتاحين إزاى رغم فقرهم؟..شايف ولادهم ناجحين اد اية..خليك بقى فقير كدا وأحمد ربنا، لاحسن لو بقيت غنى هتبقي عيشتك سودا:) "..بحيث إنه يبقى راضى عن حياته، ومستواه المادى والاجتماعى نوعا ما.. يا ريت تبطلوا النوع دا من المسلسلات لأنه فاشل ومبقاش ياكل خلاص الكلام دا، دا بقى يزود الحقد الطبقى وخلاص.. ثانيا: مسلسلات الأكشن. المسلسلات اللى بيكون البطل فيها ظابط، إلى بيصلح كل حاجة دا، إلى بيجيب حق الغلابة وبيتعامل مع كل الناس بضمير واحترام..اللى هو مافيش منه في الحقيقة دا.. الشهم إلى بيتعرض عليه رشوة ومابياخدهاش، إلى بيفضل ورا المجرم لحد مايطلع عين أمه، إللى غالبا فالآخر بيتقتل دفاعا عن الوطن.. *دموع* أو، المسلسلات إلى بيبقى البطل فيها هو المجرم نفسه، دا بقى بيبقى أخطر واحد في صحابه، مابيموتش، مابيعملش غلطة، مابيجيلوش لوز حتى.. مطلع عين الظابط ووزارة الداخلية والخارجية..و النوع دا بيكتر فيه مشهد الظابط وهو متغاظ منه وبيقول " وحيااااااااة امى، لاجيبك".. المهم إن في النهاية غالبًا بتكون إن الحرامى دا حب واحدة، وغيرته، وسبحان الله في خلال حلقتين على أقصى تقدير يكون بقى إنسان كويس ومحترم وكل الحاجات الكيوت دى، لدرجة إنه ممكن يروح يسلم نفسه للبوليس *سقفة للنجم* ثالثا: الكوميديا ................................ بلاش. بلاش تعملوا كوميدى، إلى بيعمل مسلسل كوميدى بيكون معلق لوحة كبييييييييييرة في بيته مكتوب عليها " احنا شعب ابن نكتة" "احنا شعب دمه خفيف" والكلام الجميل دا إلى بيكون مصدر إلهامه، واللى بتخليه يعمل مسلسل أو sitcom. ابن كلب:) ماتتوقعش تضحك وأنت بتتفرج على أي مسلسل مصرى يصنف على أنه كوميدى.. حاول تتجنب أغلب مسلسلات رمضان السنادى، عشان صحتك بس:D والمسلسلات الحلوة بيبان أنها حلوة يعنى.. ملحوظة ملهاش لزمة: أنا كنت بقول على المسلسل تمثيلية، ومش عارفة امتى بقيت أقول عليه مسلسل!..يمكن من بعد ما المسلسلات التركى ظهرت.. عموما كل سنة وانتوا طيبين وأعاده الله علينا بالخير واليمن والحب والبركات..
