من كام يوم كان فيه إضراب وأنا ولا عارف إيه أخرتها فى الحكومة والعيشة الهباب وأدى كل الناس فى المظاهرة أطفال وشيوخ وشباب رافعين صوتهم جوة وبرة عايزين يعرفوا إيه الأسباب فى الغلا والعيشة المرة اللى بقت ورا كل باب والناس بتطالب بحقوقها والصوت أهو واصل للسحاب ومين هيسمع بس صوتها والحكومة مش عاملة حساب والعدل ساب البلد وفاتها بعد ما شعره من الحكومة شاب وشاف حيرة الناس وعذابها وشاف كل وعودها سراب وشاف بحث جنائى وفيش مع صاحب كل رغيف عيش والناس كلها عايزة تعيش وتترحم شوية من العذاب وتصحى فى يوم تلاقى العيش إنشا الله تغمس بالتراب أهو ممكن يكون مغليش وتتخيل إنها بتاكل كباب وأهى أكلة أحسن من مفيش بس المهم تلاقى العيش من كام يوم كان فيه مظاهرة من كام يوم كان فيه إضراب وأنا ولا عارف إيه أخرتها فى الحكومة والعيشة الهباب وصوت الناس إزداد قوة بعدما كان صوتها ضعيف وأنا وإنت وهى وهو من بحرى للواحة والريف شفنا الذل برة وجوة وكنا بندعى ونقول يا لطيف وشفنا فيها راجل فتوة وبيعمل إنه راجل شريف وهو فى الأصل حرامى وفى النصب ده حريف ويسمع دايماً كلامى ويقول عليه شوية تخاريف وبياكل فول قدامى ومن ورايا بسطرمة وبيف وإحنا نقف فى طابور طويل عشان نجيب إنشا الله رغيف وناكل ونغمس بالقليل وأحياناً بنام خفيف عشان نعرف ننام بالليل ونصحى بدرى ونجيب العيش ومش مهم إحنا نعيش أو حتى نلبس طرابيش وهى دى أحوال بلدنا وأدينا راضيين بالمقسوم وبندارى الدمع جوه عيونا وبنخبى فى القلب كل الهموم وبنقول إمتى فى مصر نتهنى ونشوف الخير ولو ليوم وتروح مننا كل أحزاننا ونلاقى الخير ورا كل باب من كام يوم كان فيه مظاهرة من كام يوم كان فيه إضراب وأنا ولا عارف إيه أخرتها فى الحكومة والعيشة الهباب
