كله يدلع نفسه! كل سنة وأنتم طيبين ويارب السنة الجاية تتحقق كل أمانيكم.. وأنا طبعا عارف أن أكبر أمنية لكم هي إن الحكومة تتغير لكن صدقوني وملكمش عليا حلفان اللي تعرفه أحسن من اللي ما تعرفوش.. ورغم كل مشاعرنا الغاضبة تجاه الحكومة إلا أنه يكفيها شرف المحاولة. الحكومة بتحاول لكن ما باليد حيلة .. هاتعمل إيه واللاإيه وهاتجيب فلوس منين عشان تصرف علينا واحنا في وش عدوكم عاملين زي الأرانب والعدد في اللمون . المهم اللي يشوف بلوة غيره تهون عليه بلوته. العالم كله دلوقتي بيمر بأزمة منيلة بستين نيلة. وصدقوني والله مافيش حد عارف ممكن تودي العالم علي فين.. البعض يقول إنها أزمة طارئة ويومين سود وهيعدوا والبعض يقول إنها سوف تستمر وإنها لم تصل بعد إلي نقطة الذروة.. يعني لسه الغم الثقيل جاي وره. دول الاتحاد الأوروبي يا عيني عليها مش عارفة تعمل إيه.. كل يومين تقع دولة منهم فريسة للأزمة الاقتصادية وأكيد كله هيكر ورا بعضه. اليونان الآن تعيش أسوأ أوقاتها الاقتصادية والناس هناك بيكلموا نفسهم من الغلا واختفاء السلع والضرائب الرهيبة رغم إنهم ماعندهمش يوسف بطرس غالي.. ونفس الحال في أسبانيا والبرتغال. المهم كل سنة وأنتم طيبين..احنا مفيش حاجه بتغلب معاناوبنعرف نعيش يومنا إزاي... الصيف بدأ وكله هيروح علي مارينا.. رغم إنها أصبحت عند بعض الناس دقة قديمة.. دلوقتي فيه حاجات كتيرة أفضل بكثير. ولأننا شعب ذكي ميغلبوش غلاب.. ابتكر أصحاب الدخول المحدودة فكرة مصيف اليوم الواحد. يعني كام عيلة أو مجموعة أصدقاء يأجروا عربية ويطلعوا بيها علي الإسكندرية أو جمصة أو رأس البر.. يقضوا يوم علي البلاج ويرجعوا بالليل وهمه جايبين مشبك واللا هريسة واللا بسبوسة.. المهم أن احنا رغم كل اللي بتعمله فينا حكومتنا بندلع نفسنا. كله شغال موبيلات وميسدكولات ورسائل.. كله بقي مفتوح علي كله وماعدش فيه أسرار.. يعني حياتنا كلها بقت توك شو .. فشر عمرو أديب واللا مني الشاذلي واللا حتي معتز الدمرداش. لكن قبل ما أسيبكم عايز والله أقول وبجد إننا نحمد ربنا أنه رغم الأزمة العالمية إحنا محسناش بحاجة.. وده طبعاً لأننا طول عمرنا وربنا يكرمنا واخدين علي كده.. واخدين علي الغلا وارتفاع الأسعار ونكد وزير المالية.. يعني المعاناة مش جديدة واحنا أدها وقدود! وكله زي ما قلت بيدلع نفسه!