منذ أيام وأنا أتابع المليونيات المتلاحقة غير المكتملة التى ينادى بها معظم القوى السياسية التى نصبت أنفسها واصية على الشعب المصرى ومتحدثا رسميا باسمه فهى منذ إعلان نتيجة انتخابات الإعادة ثم تلاها الإعلان المحبط للآمال عن الحكم على الرئيس السابق وأعوانه من رموز الفساد. تساءلت يا هل ترى من المستفيد الأول من هذا التصعيد من صاحب القرار دائما فى الاعتراض أو الرفض والقبول.. اكتشفت أننا منذ تنحى الرئيس وهو المكسب الوحيد للثورة ومع كل مليونية أو وقفة احتجاجية تفتقد الثورة جزءا كبيرا من مؤيديها ويصب ذلك دائما لصالح طرف آخر تكشفه لنا الأيام والأحداث. تساءلت يا هل ترى من المستفيد الأول من هذه الفتنة المفتعلة قبل انتخابات الإعادة من المستفيد من قانون العزل وخروج المنافسين من الفلول من المستفيد من تشويه صورة المرشحين الخاسرين وتراجع كثير من مؤيديهم عنهم بعد ان ظلوا يمجدوا فى سيرتهم حتى بعد خروجهم من السباق يا ترى من المستفيد من انحسار الاختيار فى اتجاه واحد (لا للفلول... ولا للثورة أو لا للتحرير أو بمعنى أدق نعم للاستقرار) إذا أردت أن تفهم اللعبة جيدا وتصل بين السلم والثعبان راجع هذه الجملة (باقى للإخوان شوية ثوريين ما كانوش مؤيدين وشوية راجعين أو فلول غلبانين ما كانوش مؤيدين علشان مش فاهمين أو عشان خايفين) يعملوا إيه الإخوان الشاطرين يلموا الثورة فى ميدان التحرير وينزلوا شوية مع الثورين عشان يأكدوا إنهم من المؤيدين للثورة وللتحرير ويعملوا إيه كمان الحلوين ينادوا بقانون يمنع الفلول الوحشين علشان المؤيدين لشفيق والتانين مايلاقوش ليهم ياعينى بديل طيب خلصنا من الفلول ومسكنا شوية ثوريين طيب والشوية التانين المؤيدين للنخبة من الخاسرين أصل لو الفلول ماباقوش منافسين واتعادت الانتخابات يا حلوين هيرجع أبو الفتوح وخالد وحمدين طيب ودول نخلص بقى منهم إزاى دول ناس محبوبين وليهم كتير من المؤيدين نروح منزلنهم التحرير ونعمل شويه دعاية متظبطين تخلى الناس تشك حتى فى الحلوين اللى كانوا خسرانين اللى ياما قالوا كانوا نفسنا يبقوا كسبانين ويريحونا من الحيرة بين الاتنين الموجودين....) يبقى فاضل ننتخب مين؟؟؟؟؟؟؟؟ وكل اللى بيحصل لمصلحة مين.؟؟؟؟؟؟ وكان بتخطط من مين؟؟؟؟؟؟؟؟ وياترى اللى هيبقى خسران فى الآخر مين.؟؟؟؟؟؟ حتى تفهم وتجيب عن هذه التساؤلات أقول لك استيقظ أيها الشعب المغيب فأنت لم تفهم معنى الثورة جيدا استيقظ أيها الشعب فأنت لم تدرك معنى السياسة جيدا استيقظ أيها الشعب وحدد مصيرك واختر لنفسك ممثلا جيدا استيقظ أيها الشعب فأنت تخسر كل ما تملك استيقظ أيها الشعب فأنت تتساقط بين الأرجل وتتقاذف بين الأيادى استيقظ أيها الشعب فإن لم تستطع التغيير للأفضل فلا تغيير للأسوء استيقظ أيها الشعب فأنت تهدر دم الشهداء
