يلا.. يلا.. يا جدعان فتح المزاد.. يلا يا هانم يلا يا بيه.. وطن للبيع.. شعب للبيع.. وطن ما بين بحرين ونيل وشعب عليل.. قرب قرب.. خدلك قرض يا باشا واهرب.. ولا ما تهربش.. ما حدش راح يسأل عنك.. هرم للبيع غاز للبيع شركات وبنوك.. ولو ما معاكش خلى عنك.. ممكن على النوتة.. مجد للبيع.. وتراث وتاريخ توتة توتة.. فرغت منه الحدوتة.. كتاب للرازى.. ولا المرازى.. طيب ابن جبير.. ابن تغرى بردى.. تاريخ منقوش على جدران.. يحكى عظمة أجدادنا زمان.. أو منقوش على ورقة بردى.. وفى كمان كتب حواديت قرب يا باشا وقلى أنا جيت.. وصلى على النبى.. قلت لى صليت؟.. طيب ادعى معايا.. آمين.. فى كمان يا باشا قطع غيار بنى آدمين.. كلية وطحال.. فشة وممبار.. وقلب كان طيب آمين.. لأ دول يا باشا محجوزين.. للبية اللى لابس عقال.. شباب؟.. فى يا هانم.. بس طلب سعادتك شاحح شوية.. أصل اللى عندى.. مرضانين.. اليأس أكلهم.. والعجز وحياتك.. وشوية منهم نفسياً مش متظبطين.. ياريت يا هانم تسيبينى بس يومين.. وادبر لك طلبك يلا يلا يا جدعان.. قبل ما ينفض السوق.. ولا الشعب يعقل ويفوق!!
