أبين زين.. وأعرف لفين.. المستخبى واللى مش معروف.. وأضرب فى ودعي.. وتمللى بأدعي.. والمستخبى بأقوله ع المكشوف.. والناس قالوا لى بسرعة قولي.. ياريس الوزرا ليه ثاير عليك الكل.. ومجلس الشعب نازل بالشكاوى يهل.. صعبان عليه موقفك.. مزنوق ومحتاج حل.. وطالب إن الوزارة فى القريب تنحل.. مش قلت لك خللى بالك الطريق زعابيب.. وإن إنت محبوس ياروح قلبى فى حجر الديب.. لا حل بتحل ولا تربط بدون تعقيب.. لسه الرغيف مشكلة محتاج لألف طبيب.. لسه السولار والعلاج غير أزمة الأنابيب.. والشعب والشورى قالوا.. مجلسكوا أمره عجيب.. ووعدتنا ألف مرة.. فيه علاج وحلول.. ولما يوم تنزنق.. بتقولى مش مسئول.. يمكن يكون فيه عمل لمجلسك معمول.. الرمل قال والودع.. سحب الثقة مطلوب.. ومجلس الوزرا على أمره د كان مقلوب.. ومداح حتفضل على أمرك كدا مغلوب.. خدها كدا من قصيره وسيبها قول شاكرين.. السكة مش سالكة ولا الوزرا كمان قادرين.. وللا إحنا يامجلس الوزرا اللى مش فاهمين.. ووادعى صارحك وشاف ودعك شمال ويمين.. وبكره حارجع أشوف بختك وأبين زين..