وأقول على المستخبى واللى مش معروف.. أضرب فى ودعى .. وتمللى بادعى.. والمستخبى باقوله ع المكشوف الرمل غضبان.. وودعى فيه حاجات وحاجات.. وأقول لك إيه وللا إيه.. الخلق فى مظاهرات.. وشبعنام الاعتصام وعداوة الهتافات.. ما تقول بقى انت فين.. من ثورة القرارات.. الناس بتسمع كلامك فى الخطب وتبات.. تصبح تلاقى مهازل أمن واعتصامات.. وجثث ضحايا ما بين رجالة أو ستات.. واللى نبات فيه بنصبح فيه من الازمات.. المركبة عايزة ترسى يامرسى باقتراحات.. تحل كل المشاكل بينَّا فى امتحانات.. أحسن خلاص البلد شبع من البيانات.. وكل حبة اجتماع احزاب مع اعتراضات.. فسر لى الثورة فين.. والشعب فى احتياجات.. وناس تقول لك فى عرضك.. خلِّى فيه إثبات.. إنك هنا وسطنا.. ماعدش فيها سكات.. والرمل بيقول كمان. .فيه أخونه وأخوات.. يهمُّهم البلد يفضل كدا متاهات.. وهم فى الوسط يصطادوا مع الصراعات.. وانا قلت لك وانت حُرْ.. وفرصتك فى شتات.. يظهر ما فيش فايدة.. والسكة بها عثرات.. ومرة تانية حاقول بَايْ بَايْ بدون كلمات.