يامجلس الوزراء ليه ثاير عليك الكل.. وريسك كل حبة بالشكاوي يهل.. صعبان علىّ قوىّ.. مزنوق ومحتاج حل.. خايف بأن الوزارة في القريب تنحل.. مش قلت لك خللي بالك بالطريق زعابيب.. وإن إنت محبوس ياروح قلبي في جحر الديب.. لا حل بتحل ولا تربط بدون تعقيب.. لسه الرغيف مشكلة محتاج لألف طبيب.. لسه السولار والعلاج.. غير أزمة الأنابيب.. والشعب والشوري قال.. مجلسكوا أمر عجيب.. ووعدتنا ألف مرة.. فيه علاج وحلول.. ولما يوم تنزنق.. تقول لي مش مسئول.. يمكن يكون فيه عمل لمجلسك معمول.. والرمل قال والودع.. سحب الثقة مطلوب.. مدام حتفضل علي أمرك كدا مغلوب.. خدها كدا من قصيره وسيبها.. قول شاكرين.. السكة مش سالكة واللا الوزرا مش قادرين.. واللا إحنا يامجلس الوزرا اللي مش فاهمين.. أنا ودعي صارحك وشاف بختك.. وبين زين.. وبكرة حارجع وأشوفك إنت رايح فين..