عرافة طوافة أشوف البخت أبين زين.. وأقول على المستخبى واللى مخفى يا عين.. إرمى بياضك يا مصر فيه حاجات وحجات.. كترت مجالسك ولسه كل يوم أزمات .. وكل مجلس فى سكة والسكك عثرات.. المجلس العسكرى وسياسة اللواءات .. ومجلس الوزرا عاجز يتخذ قرارات... ومجلس الشعب كله طالب الكلمات.. وميت خناقة على اللايحة وعلى الطلبات... ومجلس الشورى لسه بيجرى لانتخابات... وحيعمل إيه ربنا أعلم بلا اختصاصات.. والمجلس الاستشارى قدم استقالات .. خمس مجالس مفيش مجلس شايف لك حل.. والشعب من كتر صبره على المشاكل مل.. وسألت قال الودع النار حتاكل الكل.. فضوا المجالس وشوفوا حل للأزمة.. وخلافكوا فى الرأى مش وقته.. مالوش لزمة... ويا مصر قولى لولادك إنتو رايحين فين؟.. حرام عليكم كفاية.. دمعى مالى العين.. وبكرة حارجع أشوف بختك وأبين زين..