أنا حابْتِدى بالصَّلا عَ الزِّين وألفّ لِى شارع.. واتنين حاكلِّم الناس الغافلين.. لابِدِّى قِرش.. ولا كِسْرَة. الله الله يا بدوى جابِ اليُسرا.. آن الأوان يا بَلدِّية نِشِدّ مَصر من الخَيَّة زرعوها فدادين أمِّيَة.. غير جُهَلا تِكتِب.. وبتقرا! الله الله يا بدوى جاب اليُسْرا.. متأخّرين وفايتنا كتير لكن قلوبنا غِوْطِ البير مَلِينَاها فى ميدان التحرير بمِلحمةْ مصر الكُبْرَىَ!! الله الله يا بدوى جاب اليُسْرا.. إحنا ولادها.. وِسَنَدْهَا وإحنا بَهْجِة أعيادها معقولة حَدّ مِن اولادها حيحبّ أمُّه.. بالأُجْرة؟! الله الله يا بدوى جاب اليُسْرا.. وأخدنا على ظُلْم الباغى طاغى.. يسلِّمْنا لطاغى قُمْنا وكتبنا «خلاص لاغى» وعَمَلنا ثوْرة ورا ثوْرة!! الله الله يا بدوى جاب اليُسْرا.. وفجأة فيه ناس قَسَمُونا كإنّهم.. شَقُّوا لَمونَة العُمَلا.. فى ولادنا خانُونا لِفِكْر تانى بَقُمْ أَسْرَى!! الله الله يا بدوى جاب اليُسْرا.. بَقُوا ناس كدا وناس عكس الناس وناس.. لا فِكْر ولا إحساس يا ابنى الوطن فى إيديه كُرَّاس.. وأكيد كتَبْ كل ما يِجْرَى!! الله الله يا بدوى جاب اليُسْرا.. كُرهى المؤكَّد.. لِعَدوِّى هوّه اللى ينصُر ويقوِّى أمّا البعيد قاعد يِعْوِى ويْصِيْد لى فى المَيّه العِكْرَه؟! الله الله يا بدوى جاب اليُسْرا.. عَدُوِّنا برَّه وجُوَّه أمريكى مصرى ولاد حَوَّا يعنى العدو هُوَّاه هوَّه بيشربوا فى نفس الجَرَّة!! الله الله يا بدوى جاب اليُسْرا.. حوالينا فيه ناس بِتْخَسْتَع بالذات بتوع حنفى الأَكْتَع دول من بتوع «أنا أتمتَّع بَلا فَقْر.. يِفْقِر.. بَلا فُقَرا!!» الله الله يا بدوى جاب اليُسْرا.. فينا انقسام بسّ أساسُه مش كُلُّه خايف على ناسُه وقِسْم عَفَّرُوا إحساسُه ناس.. اختصاصهم فى العَفَرَة!! الله الله يا بلدى جاب اليُسرا.. أمّا عدوِّى لوْ جَالِى حاغَرَّقُه هِنا فى كَنَالِى بِدَمِّى.. واولادى.. وْمَالى وحَجَزْت تذكرتى لبُكره!! الله الله يا بدوى جاب اليُسرا.. وِسْط اللهيب ونيران الصيف.. دى بلدنا وانا لا غريب ولا ضيف لو احْتَاجِتْنِى.. اتأخَّر كيف لو حتى فى النار الحمرا!؟ الله الله يا بدوى جاب اليُسرا.. يِعلا الغُنا وِسْط الرَّمْلة ويا تاريخ.. حَمِّل وامْلا من غير فرنسا ولا الحملة ولا تراحيل ولا سُخْرة!! الله الله يا بدوى جاب اليُسرا.. وادينا.. ليلها مع نْهارها كام شهر ونجيبوا قرارها أظن بالْغَكَ أخبارها والاّ حِلِفْت ما تِسْتَقْرا..؟! الله الله يا بدوى جاب اليُسرا.. أحلا ما فيكى يا بلد الذُّوق إنّ اللّى تحت مْخَلِّيكى فوق إحنا قلوبنا قصور الشُّوق وبنعشق النكتة الحاضْرة. الله الله يا بدوى جاب اليُسرا.. ارجع يا مصرى لنفس اللُّون إرادة حُرَّة.. تهزّ الكون وإوعى تِنْسَى انّك فَرَعون وانت اللى نطّقْت الحَجَرَة!! الله الله يا بدوى جاب اليُسْرا.. الله الله يا بدوى
