قصيدة ... حلم الصبا

مرة الصراحة ..
والحرام .. أصله غبى
وانا مش نبى ..
ولا كنت نادم .. فى طريقى
ومذهبى
وأيام .. ما كان سنى صبى
قاللى .. أبى
إسمع كتير
وإفتح عنيك
ويكون فى بير
سر .. اللى ليك
وتمللى خلى الخير ماليك
وأعاديك إذا .. ماتكون أبى
قاللى .. أبى
خلى الوداد .. للى يراضيك
واللى يداديك
واللى تمللى .. يسب فيك
خليك عليه .. حاسم نبى
وأياك تعاشر يوم رجال
زى الحريم
مهما جمايلك .. زرعت فيهم ..
طراوة .. بألف لون
والأصل .. دون
يفضل تمللى .. يزم فيك
زم التيوس ..
لأهل النفوس الطيبين
وإحرص على .. أنك تكون
واحة .. عيون
ترعى المتيم .. واليتيم
واللى معاه .. الحالة جيم
واللى غزاله .. يوم شرد
وقلبه شاتى .. ف يوم برد
واللى إتوجد .. من غير معين
وإمسح دموع .. المطحونين
وإحكى هموم .. المحزونين
خليك تمللى .. كالطبيب
وقت الندا .. دوغرى إستجيب
وأوصف بإخلاص .. العلاج
خليك .. لقلب الليل سراج
نوره يضوى .. للغريب
قبل القريب
قول يابا .. قول
دا الدهر غول
راعب .. شبابنا بالفتون
ويوصله لشط المنون
بدون ما يوصل للأمان
ولا تدركه لحظة إيمان
ويعدى م الدنيا فطيس
معرفش يوزن .. أو يقيس
أو يطرح الفكرة الحنون
وناعشت .. باستقصى الحلال
وعملته .. حلمى .. والمجال
ورفضت .. شرع الإبتذال
وعففت .. عن .. ذل السؤال
وسألت ربى .. وإستجاب
وسلكت دربى .. بالصواب
وبعدت .. عن مسك السراب
وندهت .. ارضى يا أبى
ياللى .. فى عقلى الغيهبى
قاللى .. كفاية .. إنك بشر
وحفظت نفسك .. م الأشر
ولا عمره صابك .. منها ضر
دنيا الفتون .. الملعبى
ولسه بحلم .. بالمثل
واللى فى حلمى م الصبا
لكن .. ما يوم قلبى .. صبا
ولاّ .. هجرت المرجله