السلام عليكم يا محمود باشا...لعلك بخير أنت وأخوك الباشا جمال....والله اني بحبكم واعزكم كده لله في لله عشان أنتم ناس دوغري وما تعرفوش اللف والدوران... لكن اسمح لي يا محمود باشا أنا واخد على خاطري منك حبتين...ليه ؟ أقولك ....بقى حضرتك كتبت مقالين يبان فيهم إنك مش عاجبك الإحتفال اللي حصل في أسوان بمناسبة اللي قالوا عليه من إن أسوان مابقاش فيها ختان بنات !!! ولو إني مش فاهم يعني ازاي اتأكدوا من المسألة دي لإن فيها لا مؤاخذة يعني إحراج للبنات وعيلاتهم...لكن ده ما يمنعشي إني أقولك رأيي بصراحة في مقالاتك دي... وللعلم اني اسأذنت الأستاذ "أحمد رجب " والأستاذ " مصطفى حسين" عشان أتكلم في "المصريون" بدل أخبار اليوم ...أول هام لإني زي ماقلتك بعزك أنت وأخوك جمال باشا..وتاني هام عشان ما سببش لهم إحراج مع الناس اللي فوق... يرجع مرجوعنا لحكاية احتفال أسوان...سعادتك قلت كلام يشبه كتير قوي كلام الواد ابن أبو سليم ...ما أنت عارفه كويس...هو كلامه بيشبه كلامك أنت وجمال باشا...بس هو لا مؤاخذة لسانه زالف حبتين....ماهو روخر بيقول ختان أيه وهباب أيه ؟!!! يا عالم داحنا ماليانين مشاكل وحالنا بقى يصعب على الكافر...أعلى نسبة سرطانات في العالم...وأعلى نسبة إصابة بفيروس (سي) ....وفقر وجوع وجهل وميه ملوثة ومجاري طافحة ..وزبالة مالية الشوارع...وفشل في كل حاجة...قمت شخطت فيه وقلت أخرس يا وله...ما هو صحيح اللي ما يعرفش يقول عدس....كنت اسال واني أجاوبك ...بدل الهلفطة دي اللي ما لهاش لزوم...شوف يابني...البهوات الكبار دول مرفوع عنهم الحجاب وعقلهم كبير قوي قوي...ويوم ما يفكروا في احتفال زي ده يبقى لازم فيه سبب مهم للإحتفال..أمال أنت فاكر أيه...واني فكرت وسالت وطقست ولقيت الإجابة.... بقي البهوات دول بعد اكتر من خمسين سنة تفكير في السبب اللي خلى الدنيا كلتها حوالينا اتقدمت واحنا بنرجع لورا..لقوا إن الفرق الوحيد بينا وبينهم أنهم بيسيبوا البنات في حالهم وما بيعملوش فيهم العملة السود ا بتاعتنا دي اللي هي الختان....حتقولي لا دول اتقدموا بالعلم والحرية والعمل ..أقولك لا ما حصلش...ماهو الأستاذ قمحاوي قعد يا حبة عين أمه في الإذاعة يقول من سنين طويلة هاتوا ورقة وقلم ومراية وخلوا بالكو معايا...ومفيش فايدة ...وكل شوية يزع في عم إبراهيم ويقوله سيب عود القصب ده ياعم إبراهيم وخليك معايا ومفيش فايدة....وكمان إحنا عندنا ناس متقدمين قوي ومتعلمين وواخدين شهادات من برة ومنهم اللي خد جايزة كبيرة قوي اسمها نوبل زي الدكتور "زويل" اسم الله عليه... وغيره..وغيره...وبرضه ما اتقدمناش أما بالنسبة للصحة ...فالعملية دي اللي هي الختان يعنى بتسبب قهر للبنت الصغيرة يا حبة عين أمها وتقعد تحط في نفسها لحد لما يجيها المرض البطال ده ...الشر برة وبعيد..اللي اسمه السرطان...وبالنسبة لفيرس "سي" ده سببه يا بو العريف ...إن الحلاقين والستات اللي بيعملوا الختان ده بيستخدموا عدة مش مضبوطة وملوثة وبيستعملوها مع كام بنت مرة واحدة فينقلوا المرض... وبالنسبة للجهل اللي احنا فيه ده ..أنورك ورزقي على الله ....بقى البنت لما يختنوها بتقعد كام يوم تعبانة وعيانة وما تروحش المدرسة...قوم تتأخر في دراستها وتبقى بليدة ..وممكن ما تروحش المدرسة تاني خالص وتكبر جاهلة ...وطبعاً ما تخدش شهادة كبيرة تشتغل بيها وتعدي من الفقرهي وعيلتها...قوم تلاقيها بعد كده قاعدة قدام فرشة جرجير وفجل في الشارع... عارفك بتفكر في إيه...حتقولي دول شوية بنات لكن البلد مليانة جهل وفقر ومرض ...أرجع أفكرك بالكلام اللي زي الفل اللي بيقول إن المرأة هي نص المجتمع...شفت يا ابن أبو سليم ...نصه...يعني الختان ده خلى نص البلد يمرض بالأمراض الوحشة دي ...وخلاه مايروحش المدرسة ويبقى جاهل...وخلاه ما يخدش شهادات كبيرة تخليه يشتغل ويكسب ويعدي من الفقر ...يعني بالمفتشركده الختان ده هو سبب الفقر والجهل والمرض !!!!.شفت بقى البهوات الكبار دول ليهم حق يحتفلوا بالمناسبة دي ولا لأ ؟...أديني وضحت لك الصورة يا ابن ابو سليم ...ويارب تفهم ....ويجعله عامر !!!
