لعربيات كمان ممكن تعمل اضراب عام.. إزاي.. ممكن تضرب عن العمل وتعطل.. لكن من المواقف السيئة ان الواحد ينزل من بيته الصبح وهو مستعجل عشان يروح الشغل ويلاقي عربيته عملت اضراب جزئي أو اضراب عام ومش معروف سببه الاضراب الجزئي يعني تلاقي فردة الكاوتش نايمة وبسرعة تقوم بتغييرها بالاستبن وتتأخر شوية عن الشغل، لكن لو الاستبن كمان نايم أو " مهوي " بتكون المشكلة كبيرة لأنك بتضطر تفك الفردة بعد ما ترفع العربية علي الكوريك وتأخذها والأستبن لمحل الكاوتش للتصليح ولو المحل مقفول بتروح لأي بنزينة وبعد حل المشكلة بتطير بالعربية علي الشغل وأنت متأخر ساعة أو أكثر وتمضي علي أذن تأخير وممكن يبقي فيه خصم وتلاقي يومك قفل بسرعة. والاضراب العام يعني ان العربية ما بتدورش اطلاقا وتحاول تجيب ميكانيكي وتكتشف ان مفيش حد فاتح الساعة 8 الصبح، ساعتها يبقي أمرك الي الله تقفل باب العربية وتروح الشغل بتاكسي أو ميكروباص، وطبعا طول ما انت في الشغل بتفكر ليه العربية ما دارتش وتتصل بالميكانيكي وتظبط معاه عشان ييجي معاك بعد الشغل علي طول وربنا يستر وتكون المشكلة بسيطة. وساعات العربية بتعمل اضراب في وسط اليوم وتعطل مثلا بعد ما تأخذ مطب جامد ، عموما فيه حاجات ممكن تعملها عشان العربية تفضل ماشية ومتعملش اضراب يعني تعطل.. وفي حاجات تانية ممكن تعملها لو العربية عملت اضراب وعطلت أولا الحاجات اللي ممكن تتعمل عشان نقلل أعطال العربية : يقول المهندس أحمد محسن مدير ورشة في أحد التوكيلات الكبري ، يجب القيام بالآتي : 1- الصيانة الدورية: يعني عمل الصيانات للعربية في مواعيدها عند التوكيل أو مراكز الخدمة المعتمدة، مثل تغيير الزيوت والسيور وتيل الفرامل والفلاتر وغيره ..... والصيانة الدورية بتضمن لنا ان كل جزء في العربية يتم صيانته في ميعاد الصيانة (مثل تغيير زيت الموتور) أو يتم تغييره في ميعاد التغيير (مثل تغيير فلتر الهوا أو البنزين) وهذا يقلل حدوث الأعطال المفاجئة لأقصي درجة. 2- الصيانة الوقائية: زي اللي بنعمله قبل السفر بالعربية، يعني نروح للتوكيل أو مركز خدمة معتمد عشان يكشفوا علي ميه العربية وزيت الموتور وزيت الباور وزيت الفرامل والسيور وبلية الكاتينة ويكشفوا علي الموتور بسماع صوته وعلي المارش وعلي تيل الفرامل وعلي حاجات تانيه عشان يتأكدوا ان العربية مش هيقل أدائها عن مستواه الطبيعي ولا هتعطل.. ويستحسن اننا نعمل الصيانة الوقائية كل شهرين.ثانيا: الحاجات اللي ممكن تتعمل لو العربية عطلت: يضيف المهندس أحمد محسن: أعطال العربية تحدث بطريقتين: 1- والعربية مركونة.. ندورها ما تدورش.. طيب نعمل ايه؟ • أول حاجة نعملها الفحص بالعين يعني نفتح الكابوت ونتأكد ان كابلات البطارية مربوطة كويس، ونشوف فيه زيت تحت العربية حصل له تسريب (ممكن يكون زيت موتور أو زيت فتيس)، وكمان نمشي حول العربية ونشوف الكاوتش ممكن تكون فردة كاوتش نايمة. • بعد ما نضع مفتاح الكونتاكت ونلفه وقبل ما ندور العربية هنلاقي شوية لمبات نورت في التابلوه وبعد كده تطفي لأن العربية بتعمل فحص اوتوماتيكي لنفسها.. نستني لغاية لما تطفي كل اللمبات لأن اللمبة لما تطفي يعني العربية عملت فحص علي الجزء ده وانه سليم .. اذا كان فيه لمبة لسة منورة يبقي الجزء اللي بتعبر عنه اللمبة عطلان.. لكن لازم نعرف ان لمبة الموتور ولمبة البطارية ولمبة الزيت بيفضلوا منورين وما ينطفوش الا بعد ما تدور العربية ولو حصل ان لمبه منهم فضلت منوره بعد التدوير أو انطفت ونورت وانطفت تاني ونورت واستمرت كده يبقي الجزء اللي بتعبر عنه اللمبه عطلان. • بعد ما نضع مفتاح الكونتاكت ونلفه وقبل ما ندور العربية هنسمع صوت زنه بسيطة هي صوت طلمبة البنزين بتحضر كمية منه عشان تدور العربية.. اذا ما سمعناش صوت الزنة معناها ان الطلمبة فيها عطل. • المارش مش شغال.. يعني لما بندور المفتاح مش بنسمع صوت المارش وده ممكن يكون من البطارية لما تكون نايمة ونعرف ده ازاي؟ نقوم بتشغيل النور علي العالي اذا كان الضوء ضعيف يبقي البطارية نايمة وممكن نضغط علي الكلاكس كذا مرة اذا كان الصوت ضعيف يبقي العيب في البطارية... لكن ممكن يكون العيب في المارش نفسه ونقدر نعرف ده اننا نحاول نفتكر في الايام قبل ما تعطل العربية لما كنا بندورها هل كان صوت المارش خشن اكتر من المعتاد أو كان فيه صوت غريب .. لو كان ده حصل يبقي العيب في المارش بالتأكيد. • وحدة التكويد الموجوده في المفتاح الالكتروني.. ممكن المفتاح يكون وقع مننا واتفتح ووقعت منه وحدة التكويد (وهي الوحدة اللي عليها كود العربية) وحجمها في حجم اللبة. 2- والعربية ماشية.. تفصل مرة واحدة • ممكن العربية تفصل مرة واحدة لو حصل عطل في أي قطعة من القطع الكهربائية مثل البوبينة أو طلمبة البنزين أو حساس الكرنك. • وممكن العربية تعطل بعد مطب جامد وساعتها نركن ونشوف تحت العربية هل فيه زيت اتسرب .. اذا لقينا زيت ممكن تكون كارتيرة الموتور اتكسرت من المطب أو من طوبة خبطته وطبعا هنلاقي لمبة الزيت نورت في التابلوه.. وممكن بعد المطب ننزل من العربية ونلاقي جزء شكله غريب في العفشة يعني ممكن يكون مقص أو مساعد اتكسر أو اتلوح. المهندس أحمد محسن وفي النهاية المهندس أحمد محسن ينبهنا إلي ان أهم حاجة في تصليح العربية هو تحديد المشكلة علشان نعرف نعمل ايه ، ويؤكد ان أعطال العربية إما تكون من الاجزاء الميكانيكية وهي أعطال بتاخد وقت في التصليح والتغيير لكن ليها مؤشرات عبارة عن أصوات بتتسمع قبل العطل بمدة أو نحس ان اداء العربية مختلف في بعض الحاجات وساعتها لازم اذا حسينا ان فيه حاجة مش مظبوطة نروح نكشف علي العربية في التوكيل.. وفيه أعطال من الأجزاء الكهربائية وهي أعطال سريعة التصليح والتغيير لكن بتحصل من غير مؤشرات، وممكن نمنعها بنسبة كبيرة لما نعمل الصيانة الدورية والصيانة الوقائية.
