شمس صبحك جات يا بلدي = بعد غربه وليل طويل اغزلي من نورها توبك = يبقي غنوه لكل جيل فكي كل قيود ضلامك = حمل باطل كان تقيل افردي ضحكة طموحك = ضي شمعه بميت فتيل خلي ابنك يبقي صاحي = شهيد بلاده ما راح قتيل خلي إيده في إيد أخوه = يبني حب قلوب تميل عبي عرقك في الكاسات = يبقي فيه إنتاج دليل خلي سر المجد علمك = شعب جاهل عاش ذليل انسي كل جراح ماضيكي = أوعي تاني دموع تسيل قولي باسم الله وعدي = مدي خطوه بألف ميل قومي شدي الحيل بعزمك = هدهدي الحلم الجميل افتحي بيبان جناينك = شهد حبك يبقي نيل سيبي بلبل جاي يغني = ويا الحمام يعزف هديل جددي صفحة تاريخك = مصري حر ماليه مثيل خلي كل الدنيا تعرف = إني ابن النيل أصيل