ارحل وخد حزبك معاك خلى النهار يطلع علينا من وراك ارحل يا حاكم بالطوارئ والحديد ارحل وسيب مصر اللى سايب حكمها لتاجر حديد أنا ثورتى جواى لومت ميت مرة الثورة مش هتموت من جوة ولا برة أصل اللى قام بيها من بطنها الحرة ولحمة شباب الوطن يا مسعورين مرة سرقتوا خير أرضنا وأهه بانت فضايحكم ولسة نفسك فى دولة المسروقين تحكم ما تقولى إيه السبب وليه الشعب واجعكم قاللى عبيد عزبتى وأنا اللى بايعكم يا مصر قومى انفضى من التراب توبك وكفاية يملى ابدبه وجيب محاسيبه من جيبك يا مصر بطنك لا كدبت ولا عمره كان عيبك بس الجبان الردى مصانشى ترحيبك الثورة رمل اتفتل فى إيدين شباب مكبوت مهمهوش العواقب ولا جاش فى باله الموت غزل الفساد طرحته وخيم عليها سكوت قام الشباب ينهشه ويحطه جوة تابوت قمنا شباب نحرصك ونسددوا دينك نحلف على عهدنا والدم فى إيدينك لا هنرحم اللى سرق ولا اللى بايعينك أسود بتحرص عرينك وديابه خاينيك من نار هتاف الشباب اتحررت راسك قومى انفضى شعرك واتمايلى على ناسك متصدقيش الضحكة فى خشم حراسك نامى فى ميدانك وسيبى حضن أنجاسك الكدب عشعش سنين منكم فى ملامحنا بعتوا العرق والدم والخير ومصالحنا عشتوا سنين تكدبوا وأخدتوا مطارحنا والخلق متقدمة وإحنا هنا إحنا صباح ميدان تحرير بنحررك منه مجاش فى بالى رئيس ولا قانون سنه ولا حرس عواجيز متعلمين منه سنين بيكدب سنين والكدب دا جنه لا فى الميدان كنتاكى ولا هارديز ولا بيبسى الأكل كشرى وفلافل والفول وجع درسى النومه ع الأسفلت والقعدة بلا كرسى نسيوا يقولوا الميدان بتغنى فيه نانسى ليل المهانة خلص صبح الكرامة لاح يا مصر شمسك هتطلع تكنس كلاب ونباح تمسح دموع مظاليم وتداوى فينا جراح ومهما تعوى دياب لازم يجينا صباح ترحل ما ترحل تاريخك أصبح تاريخ بطال شفنا التناحة ف سياستك وشفنا لعب عيال وختمت سيرة حياتك بحمير وخيل وجمال ترحل ما ترحل تاريخك أصبح تاريخ بطال
