يا مصري... عايش وسط الهموم والضياع أيا فرعون... صبحت الآن من الجياع وسألتك يا مصر ليه تظلمي المصري..؟ قالت وليه يصبر..؟ قاللي وايه مستطاع..؟ *** وليه يا جميل ما بقيتش بسمع ضحكتك..؟ وخايف عليك مالحزن تدبل وردتك وبلاش تفكر في اللي راح واللي كان واحلم ببكره... بكره الزمان يسعدك *** فيه حاجات بالقلم بترفض تنكتب وجراح لا بالدموع والندم راح تنشطب ودقايق تمر عليك بطول الزمن وسنين تفوت من ابن آدم ولا تنحسب *** مديون أنا لشوشتي وعليا حمل تقيل وعمري يوم ما بكيت ولا اتسمعلي عويل وازاي اعيش مكروب وليا رب كريم يرزقني لو طلع النهار... ويسترني آخر الليل *** يا عيني عاللي يحب.. ولا يلقاشي وعاللي يبيع أخوه.. ولا يستناشي يا عيني عالدنيا من غير أخلاق ما تعرف ساكنينها ناس... ولا مواشي *** ومشيت يا قلبي كتير وتعبت مالمشاوير سامحني يا قلبي أصلي لحبيبي أسير لا تلوم عليا واصبر معايا يا قلبي طريقنا مليان شوك لكن في آخره حرير *** قاعد على شطك يا نيل أغني في القمر مواويل سهران أشكي أنا... ما اعرف نهار من ليل وليه ساكت يا سر الحياة على أرضنا..؟ قال اصبر يا ولد دا الصبر برضه جميل *** سألت ابن آدم ازاي تعيش وسط الذئاب..؟ وازاي وإنت وديع مش خايف مالكلاب..؟ كشر بأنيابه وقال: باين عليك غلبان أنا ديب في شكل الحمل ودي يابني شريعة الغاب *** اكتم جروحك يا قلم .. واحلم وغني لا ينقطع منك مدد يا كل فني يصرخ صريرك عالورق وتقول كمان ولا ينكتم صوتك في يوم يا حته مني *** يا شوق روح وقوله بتداري ليه محبتك..؟ يا قلبي ليه تشتاق له..؟ وقلبه سامع دقتك يا روحي ليه بتروحي لما تشوفي عنيه..؟ ويا عمري ليه بتجري وليه سريعة خطوتك..؟ *** المصري هان في الغربة وفي بلده هان عالحكومة ولما تقول يا مصري ما اعرف دا مدح ولا شتومة وعايزني أرجع احب مصر زي زمان قول للزمان يرجع زي ما قالت ثومة *** ربيعي بدأ يا ناس والشتا خلاص ولى شهور وراها سنين بعشق عنيك والله وأنا عقلي بيسألني قلبك عشقها خلاص..؟ اصبر.. وروح اسألها بتعشقك ولا..؟ *** المشاكل بينكم لابد من حلها وليه تجيب في سيرة أهلك وأهلها دا بكره الميه ترجع لمجاريها فبلاش تشرب مية إنت اللي عكرتها *** قال: نفسك في ايه يابن آدم..؟ قلت: له في الستر قال: وتخاف من ايه..؟ قلت: أخاف مالغدر قال: ايه يريح ضميرك..؟ قلت: صلاة الفجر قال: ايه يعينك عالبلا..؟ قلت: الرضا والصبر *** يا ورد ليه تدبل وإنت أجمل الأزهار...؟ يا شجر حزين عايش وسط الغبار ويا نيل عجوز ساكت ... لمين تشتكي...؟ وإمتى يا مصر يطلع عليكي نهار...؟ *** يا عيني عليكي يا مصر يا بلد زيك مفيش ناس غرقانه في العز والغنا والياميش وما تقوليش يا جدع وما تعيدليش دا فيه ناس مش لاقيه لقمة عيش *** شد حيلك يا عم حسين... وربنا يقويك اوعاك يهدك مرض... ولا يشمت عدوك فيك وارفع راسك لربك دا فرجه قريب إمبارح كان لك... معلش النهاردة عليك *** قالوا الناس في مصر بقوا زي الديابة ولما قابلت الديب قال: يابني الديابة غلابة عمرك رأيت من ديب يأكل لحم أخوه ولكن همك يا مصر يتحكي عالربابة *** زقزق الطير عالشجر وقاللي مالك .؟ لا تحزن على رزق ولا تحزن على مالك وابكي على هم البشر تلقاهم قبل ما يحزنوا لحالهم يبكوا على حالك *** قال الزمان: يا ما في الجراب يا حاوي الإنسان مالهش أمان... حتى ولو كان غاوي عيش الحب وانسى الهم والأحزان لا جراح بتتعافى... ولا طبيب بيداوي ***
