1- نزلت اسرح باستمارات تمرد زي بتوع المناديل و الولاعات. ركبت اتوبيس، و بعلن عن الاستمارات، و اللي يحب يتمرد يا جماعة، اللي مش عايز مورسي يكمل.. ما حدش اهتم في الحقيقة. واحد جالي من اول الاتوبيس و قال لي كلنا بنحب مورسي، و اعد يشتم فيا و ف شكلي ( شكلي اللي انتو عارفينه طبعا و باين في الصور، انا مش مستخبية )، المهم انا لسة بقي هفرش له الملاية، لقيت الملاية اتفرشت لوحدها، و الرجالة و الستات اعدوا يدافعوا عني لغاية ما الراجل خرس خالص وراح عند السواق. و لقيت كل واحد بيندهلي هاتي استمارة و اعدوا يوقعوها.. هما اصلا كانوا مترددين او مش ناويين يوقعوا انما قلة ادب الراجل خليت الناس تتمرد. الحقيقة شكرت الراجل و انا نازلة علي مساعدته ليا 2- نزلت رمسيس و قلت اخد اتوبيس تاني لغاية التحرير، لسة بقول تمرد يا جماعة، طلعت فيا واحدة ست، انتو عملاء و مأجورين و خونة… عينيا زاغت زي في افلام الكارتون، و قلت بس انا وقعت في مشاهدي القناة الاولي المصرية، و مين اللي دفع لك حق الورق دة.. قلت اجيب م الاخر بقي.. امريكا. و سيبتهم و نزلت. السواق قال لي ما تزعليش في ناس ضلمة كدة.. 3- رحت بقي مقر تمرد عشان اساعد في عملية الفرز. كل الناس اللي راجعت استماراتهم بتكتب اسم المحافظة و بس، الا بتوع شبرا. يكتبوا القاهرة بخط عادي، و اخر الصفحة شبرا بخط كبير اوي.. رجالة و ستات 4- طلعت علي الزمالك علي الاعتصام بتاع وزارة الثقافة.. مبدأيا، نص اللي كانوا واقفين مالهمش علاقة بالثقافة بالمعني الضيق، يعني مش كتاب و لا فنانين لكن مؤمنين بأهمية الثقافة و الفن و الادب، و ناس من كل الطبقات والاعمار.. حاجة تفرح الحقيقة.. اول ما الاخوان و كبيرهم المغير ظهروا، معرفش ازاي العالم ظهرت من كل حتة و الناس جاية مستحلفة للاخوان.. انا ما شفتش مشهد الضرب لاني كنت واقفة ورا، بس كان كل ما نقول " ارررررر" الاخوان يجننوا اللي علي راسه بطحة بقي.. لحد موقعة رشا عزب و المغير. -5 الشرطة كانت في منتهي الادب والذوق و الحرفية. طبعا اول ما اتصاب لهم مجند من قبل الاخوان، المدرعة لفت و ضربتهم بقنبلة غاز.. وطلعوا يجروا واحنا وراهم لغاية ما دحرناهم تماما من منطقة الزمالك.. - 6 كان في شباب صغير في السن بيهتف ويغني ضد الداخلية.. كلمتهم بالراحة، يا جماعة لما الشرطة تكون محترمة نحترمها، لما تبلطج علينا نبلطج عليهم.. انما عمال علي بطال شتيمة لأه. قالوا خلاص ماشي، و غيروا الهتافات.. -7 صديقة في المكان شاورت علي 2 ستات واقفين بيتفرجوا ع العروض الفنية و بيصقفوا و يغنوا، و قالت لي دول جمعوا 5000 استمارة تمرد في امبابة، بيقفوا في الشارع و يكلموا الناس.. رحت لهم و قلت لهم ممكن ابوسكوا و احضنكوا انتو ستات جدعات اوي.. بجد احنا في عصر الستات. -8 انبسطت اوي بوجود الفنان هاني شنودة و فرقته المصريين علي حشبة المسرح و كلنا غنينا معاه و في الاخر، تحيا مصر و يسقط المرشد وإخوانه.
