امبارح ركبت ميني باص 39 ( و أعدت ) و بعدين طلعت استمارات تمرد، و سألت حد يحب يمضي. كل الركاب قالوا خلاص تمردنا. الست اللي جنبي بصيت لي بزعل و قالت لي انتو ليه ما جيتوش عندنا. قلت لها عندكوا فين يا ماما. قالت لي في بولاق ابو العلا. قلت لها لا اكيد في ناس راحت. قالت لي راحوا ورا ماسبيرو ما جوش عندنا. قلت لها عندك فين. قالت لي شارع الوابور عند اخبار اليوم. المهم راحت واخدة مني استمارة و ادتني بطاقتها و مليت لها الاستمارة و بعدين هي مضت. و راحت واخدة ورقة تانية، و قالت لي دي هديها لولادي يصوروها و يوزعوها في الحتة، لفلان و للفلان و لفلان، و فلان يصوروا منها برضه و يجمعوا توقيعات، و فلان .. لأ فلان دة بخيل مش هيصور، انا هصورها له علي حسابي و اديهاله.. انا تقريبا عرفت كل سكان المنطقة من الست المصرية الجميلة دي.. المهم اديتها بياناتي و قلت لها انا هاجي اخد الاستمارات منك و هكتب لك تحية ع الفيس بوك عشان انتي ست مصرية جدعة. بعدين رحت الزمالك اتابع اعتصام المثقفين، كان في انشاد رائع و بعده عرض بانتومايم لفريق الصم و البكم. كانت حاجة جميلة جدا مشاركتهم و روحهم الجميلة. و كل الناس كانت بتشجعهم. قابلت "الصديق الثائر سيد محمود وكان نازل البلد قلت له خدني معاك. واحنا واقفين مستنيين تاكسي، فرملت عربية ملاكي بشكل فجائي شوية و صاحبها سألنا بلهفة فين بتوع تمرد. قلت له انت عايز تمضي. قالي ايوه، و احنا قلنا نمضي هنا عشان واثقين في بتوع الثقافة. طلعت له استمارتين له و لمراته، نزل و ساب باب العربية مفتوح علي اخره عشان بسند علي شنطة العربية، و مراته ورا بتمضي علي استمارة تانية. سيد راح قفل باب العربية عشان ما يتخبطش. و بعدين الراجل قال لي معاكي استمارات تانية، انا هكلم باقي العيلة. قلت له اتفضل. ربع ساعة بقي .. ايوة يا طنت، تمرد هنا، بطاقتك كام، و عمو، هاتو البطايق، و بعدين رجع لمراته، كلمي اهلك.. ايوة يا ماما، ايوة يا طنت.. انا اعدت اضحك من حماسة العيلة المصرية الجميلة دي، و سيد اعد يكتب الواقعة ع الفيس بوك لغاية ما خلصوا.. نزلت البلد و اتمشيت شوية، لو الخديوي اسماعيل خيروه يرجع يعيش في القاهرة اللي بناها و اللا يكمل في تربته، هيكمل في تربته.. المهم لقيت محل مأكولات سورية و ايس كريم مكس تركي، و شاب كل الناس عمالة تقول له لا انت مش تركي، انت سوري.. و الراجل يقول لا انا تركي.. المهم قلت اجرب الايس كريم التركي الميكس دة.. طلع أمسخ حاجة في الدنيا.. عند الاسعاف لقيت نصبة شاي، قلت للشاب معلقة سكر و النبي لحسن التركي دة ماسخ اوي. قال لي ما انتو شعب زي القرع تمدوا لبرة. ضحكت. حط لي معلفة سكر محترم ع الايس كريم و مشيت.. ركبت برضه ميني باص 39 في الراجعة، بسأل الركاب. كله تمرد. تمام. بسأل الناس في الشارع اللي بيوصل ع البيت.. تمام كله تمرد، ما عدا 3 طلعوا عملاء مزدوجين تمردوا وتجردوا.
