أعلنت الفنانة زيزي عادل، اعتزالها الغناء، من خلال مقطع فيديو نشرته عبر حسابها بموقع الرسمي بموقع تبادل الصور والڤيديوهات القصيرة "انستجرام". وتصدرت زيزى عادل محرك بحث جوجل خلال الساعات الماضية ونرصد فى السطور التالية أبرز أعمال زيزى عادل.. أعمال زيزى عادل - بدايتها الفنية كانت مع برنامج المسابقات "ستار أكاديمي 2" عام 2004. - انضمت إلى شركة "روتانا" وأصدرت أول ألبوماتها بعنوان "واحدة طيبة" عام 2007. - أصدرت ألبومها الثاني "وعد عليا" عام 2009. - قامت بتصوير العديد من الأغاني المصورة منها "حب مش محسوب عليا"، "وعد عليا"، و"واحدة تانية" التي حققت نجاحا كبيرا وهي من ألحان تامر عاشور. - قامت بتلحين عدد من أغانيها بنفسها. - آخر أغاني زيزي عادل أغنية "خد هنا اقولك" العام الماضى . - آخر حفلاتها الغنائية كانت 29 أغسطس 2019، حيث أحيت حفلا ضمن فعاليات مهرجان القلعة الدولي للموسيقى والغناء على مسرح محكى القلعة. بعد اعتزالها الفن.. معلومات عن الفنانة زيزي عادل زيزي عادل: قررت اعتزال الغناء وعايزة أموت وربنا راضي عني.. فيديو اعتزال زيزي عادل وقالت زيزى عادل : "أنا النهاردة طالعة أقول خبر مهم أخدته في حياتى وهو قرار اعتزالى". وأضافت : "قررت أسيب مهنة المطربة والقرار أنا ماأخدتهوش امبارح أنا وخداه من فترة كبيرة جدا، بس يمكن مطلعتش قلت وقتها لأنى كنت حابة أتكلم مع نفسى ومع الناس القريبة أوى.. الناس القريبة منى عارفين نفسهم ولما قلتلهم على القرار شجعونى ودعمونى كمان، ويمكن قرار الاعتزال ده بيبعدنى عن أكتر مغريات الحياة وهى الشهرة والأضواء". وأوضحت زيزى عادل : "أنا ببعد عن الفن عشان بقرب من ربنا، والفترة اللى فاتت قربت من ربنا جدا، ولقيت ان القرآن بيقولى إنى لازم أكون ست ملتزمة، وبحاول على قد ما بقدر أكون ملتزمة وهتستغربوا شوية انى طالعة بشعرى ومش محجبة، ويمكن ده لأنى لسه ربنا لم ينعم عليا بالحجاب، وبدعى ربنا يتممها عليا، وكل حاجة بتيجى خطوة خطوة ومفيش حاجة بتيجى مرة واحدة". وقالت زيزى عادل : "أنا عاوزة أقول كمان الفن هو مصدر دخلى ورزقى، وأنا بسيب حاجة بعيش منها وسيبتها وعارفة إن ربنا هيرزقنى، وأنا راضية جدا عن قرارى ومبسوطة جدا بيه وحابة اللى جاى جدا وحاسة إن حياتى اختلفت تماما.. يمكن لما أخدت القرار تعرضت لمواقف واللى تسمى اختبار من ربنا وكان اختبار صعب والإنسان ضعيف، لأن جالى عرض مجاليش وأنا بمارس مهنة الغناء، ولكن الحمد لله ربنا كرمنا وقدرت ارفض من دعم من ناس حواليا.. أنا مش عاوزة أدخل في حتة إن الفن حلال والفن حرام، عشان مبقاش طالعة إنى داعية أنا طالعة بتكلم عن نفسى، وإنى بطلت أغنى ودينى بيقولى كده وكل واحد حر في حياته". وأخيرا قالت زيزى عادل : "أنا حابة أموت وربنا راضى عنى ويمكن دى حاجة كلنا بنتمناها، فأنا مش عارفة هاموت امتى ولكن كل اللى عاوزاه أكون مستعدة لمقابلة ربنا وأقابله وأنا راضية عن نفسى وحياتى وأفعالى، والحمد لله ربنا كرمنى والتزمت، وربنا يكرم ألتزم اكتر وادعولى ان ربنا يثبتنى على اللى انا فيه".
