تزايدت مشكلة ارتفاع فواتير الكهرباء والمياه بشكل كبير فى الدقهلية مما اثار حالة من الاستياء خاصة لدى البسطاء والفقراء والذين لا تكفيهم مرتبات او العمل باليومية حيث ارتفعت بشكل ملحوظ خلال الاونة الاخيرة. "صدى البلد" التقت بعدد منهم للتعرف على هذه المشكلة وابعادها، حيث يقول سمير عبد الفتاح: "الكهربا كانت بتيجى لينا كل شهر 30 جنيها دلوقتى بقت 50 جنيها واكتر واحنا معندناش تكييف ولا بنستهلك كهربا اوى، حتى الميه مش مرحمون من ارتفاع فاتورتها اللى كانت بجنيهات بقت دلوقتى 90 جنيها واكتر فى الشهر". واضافت جيهان الشربينى: "فواتير الكهربا زادت الشهر ده، ومفيش الا السخان ومش بنشغله علطول اما بالنسبة للميه فالفاتورة كانت بتيجى 20 جنيها فى الشهرين دلوقتى 40 جنيها فى الشهر بس احنا مع الريس بس يا ريت الحكومة تشوف قصة الفواتير عشان الناس والله غلابة واملهم في البلد كبير". وتابع محمد مصطفى: "انا متجوز وعندى اربع بنات وبشتغل عامل ياليومية هجيب منين كل شهر300 جنيه للكهرباء والمياة وبناتى اللى فى المدارس يعملوا ايه هصرف عليهم منين اكل وشرب وايجار وكمان فواتير كهربا وميه كده حرام لازم يقللوا الفواتير". وتضيف هدى محمد قائلة: "ياريت الحكومة تبص على الناس الغلابة ويرحمونا عشان نعرف نعيش، ولما يرفعوا فواتير يعرفوا ان فى ناس تقدر وناس متقدرش كل واحد ليه ظروفه ربنا اعلم بها ومفيش مسئول هنا بيهتم بده كله كلام مفيش تنفيذ". ومن جانبه اكد المحاسب حسام امام محافظ الدقهلية، انه عقد اجتماعا مع المهندس عزت الصياد رئيس مجلس إدارة شركة مياه والصرف الصحي لسرعة دراسة وبحث مشكلة ارتفاع فواتير مياه الشرب وأسفرت تلك الدراسة عن وضع منظومة لحساب استهلاك مياه الشرب في كافة الأنشطة بدايةً من الاستهلاك المنزلي والأنشطة التجارية والأنشطة الأخرى وتمت موافقته على بنود تلك المنظومة وبعد العرض على مجلس إدارة شركة مياه الشرب والصرف الصحي.