تحدث الفنان محمد هنيدي عن علاقته بوالديه وزوجته، كما كشف عن بدايات دخوله التمثيل ورفده من الجامعة. محمد هنيدي: والدي كان عايزني أطلع وكيل نيابة و في بدايتي هزقني و قالي أنت كومبارس و قال محمد هنيدي، في تصريحات ل«ABtalks»:«سبت بيتنا وأنا عندي 20 سنة ووالدي كان عايزني أطلع وكيل نيابة لكنه اقتنع بالتمثيل لما اترفدت من كلية الحقوق، وشاف الناس بتجري ورايا في الشارع في إمبابة بعد عرض مسلسل البخيل وأنا، ساعتها عرف إني هكون ممثل فعلا». وأضاف:«زوجتي معايا من بداياتي وليها دور كبير في مشواري، وقولتلها زمان، لو تميت ال 35 سنة ومكنتش حققت نفسي في التمثيل، هغير المجال وهسافر أشتغل حاجة تانية ،وعلاقتي مع والدي ووالدتي كانت كلها صداقة وبالتحديد مع أمي، هي اللي كانت الحكاية، والدي الله يرحمه في طفولتي كان بيسافر كتير، ولما كبرت اتحولت العلاقة لصداقة كبيرة لآخر يوم، الله يرحمهم». و استكمل :«والدي لما قولت له همثل، قال لي ربنا معك ،جبته في رواية، وكنت بقول جملة، هزقني وقالي انت كومبارس ودا اللي سبت عشانه الجامعة، وشقيت طريقي، وأول مرة اتفرج عليا كان في مسرحية حزمني يا، والله كان أسعد يوم في حياتي، وكان ربنا كرمني في المسرحية دي،وبعد كدة كان متابعني ويجي كل المسرحيات، أما الحاجة كانت معايا في أي حاجة». و أختتم :«فكرة ضرب ولادي وأذاهم مش واردة عندي، والعقاب له طرق كتير والنهاردة الولاد جايين في عالم صعب ووقت صعب، وهما مسؤولية أنت هتُسأل عليها». اقرأ ايضًا مسلسل رمضاني وثروة تتخطى ال100 مليون.. تصريحات محمد هنيدي تقوده ل«التريند»