فجع الوسط الفني بخبر وفاة الفنان والمؤلف تامر ضيائي، حيث أعلن الفنان عمرو عبدالعزيز، خلال الساعات القليلة الماضية خبر الوفاة. ونعي الفنان عمرو عبدالعزيز الفنان الراحل تامر ضيائي عبر حسابه الخاص على موقع التواصل الاجتماعي فيسبوك، قائلًا: «كده يا تامر تمشى فجاءه كده وتخضنا كلنا لا إله إلا الله ..الله يرحمك يا حبيبى ويجعل مثواك الجنة يارب العالمين». وصية الراحل تامر ضيائي شارك الفنان تامر ضيائي وصيته مع متابعيه عبر صفحته الرسمية عبر موقع التواصل الاجتماعي فيسبوك، معلقًا: «ده هيفضل باين على صفحتي لحد ما أموت..» وكانت وصية الراحل تامر ضيائي كالتالي: 1. صلاة الجنازة أهم من العزا وهي اللى كل ما العدد زاد كل ما ثوابي ما كان أكتر، فأرجوكم تصلوا عليا. 2. مش شرط تيجى العزا وياريت لو اتعمل في البيت أو مكان بسيط بفلوسه تطلعولى صدقة جارية أفضل. 3. من فضلكم لم يثبت أو يتفق عليه عمل خاتمة قرآن للمتوفى إنها هتوصله، بس مثبت إن الدعاء والصدقة بيوصلوا للميت، فرجاء دى بالذات بلاش وإدعولى الوقت اللى هتقروا فيه جزء فضوا نفسكم وإقعدوا إدعوا فيه. 4. بلاش صدقة جارية تقليدية وسهلة ومش مستفاد بيها يعنى المصاحف كتير في مصر أوى وكل بيت فيه كتير فممكن نحط الفلوس في جامع بيتبني أو كرسي متحرك في مستشفى يستفادوا بيه المرضى أو دخول مياه لبيت غلابه أو بناء سقف لبيت فقراء، حاجات ناس تستفيد بيها لمدة طويلة. 5. دى نقطة مهمه اوى بالنسبة ليا.. محدش يقول لحد بتعيط عليه ليه، ومتعيطش عشان هو بيتعذب!! الكلام دة غلط، سيبوهم يعيطوا لحد ما يطلعوا كل الشعور اللى عندهم ومفيش حاجه بتقول إن العياط معناه عدم رضا بقضاء ربنا «وأبيضت عيناه من الحزن فهو كظيم». 6. أهم حاجة تاني هي الدعاء وبس والصدقة. 7. من فضلكم تكثفوا الدعاء وقت نزول القبر وتتصدقوا بأى حاجه بنية إن ربنا يجعل قبري روضه من رياض الجنه ويثبتني عند السؤال لأن ده أهم وقت ليا وياريت كمان بعد ما تدفنوني تقعدوا معايا شوية ومتستعجلوش تمشوا عشان تونسوني في ليلة زي دي. 8. الموت علينا كلنا حق وإحنا كلنا أمانات ربنا وهيردنا تانى، فالحزن على الفراق هونوه على نفسكم بالدعاء ليا عشان أبقى في سعادة لحد ما أقابلكم تانى. 9. اللي بيحبوني يدعولى كتير عشان لو مفيش حد يدعيلي. 10. ودى مهمة أوى أوى أوى عاوز الكل يسامحني على أي حاجه عملتها فيه بقصد لو بدون قصد. فيما اختتم الراحل تامر ضيائي وصيته بدعاء «اللهم إن كثر موت الفجأة من حولي وكثر موت الشباب غفلة، ف يارب إن كنت أنا القادم فأحسن خاتمتي وارزقني نطق الشهادة عن الموت ويسّر طلوع روحي وهوّن عليّ سكراتي فإني أحب أن ارحل في هدوء وسكينة وطمأنينه، ولا تقبض روحي إلا وانت راضٍ عني لكي اكون عبدا مقبولا عندك حتي أليق بلقائك العظيم وإن كان لي من العمر باقي فأغفر لي ذنوبي ومعاصي نفسي الأمّارة بالسوء وأعفو عني وأمحو لي كل ما يعرقل طريقي إليك وردّني إليك ردًّا جميلاً يارب العالمين».