كشف سيد عبدالحفيظ، مدير الكرة السابق بالفريق الأول لكرة القدم بالنادي الأهلي، عن مفاجأة بشأن فشل انتقال الراحل أحمد رفعت، جناح نادي مودرن سبورت إلى صفوف الأهلي. وقال سيد عبدالحفيظ، خلال حواره بيرنامج «اللعيب»، المذاع عبر فضائية «ام بي سي مصر»: «اللي فصل أحمد رفعت، عن الانضمام إلى الأهلي فكرة جت في دماغي الساعة 2 بليل». وأوضح: «الصبح في يناير 2023 أحمد رفعت، كان في النادي الأهلي وكنا اتفقنا خلاص على كل حاجة، وكنا لا نعلم أي تفاصيل عن أزمة سفر اللاعب في الإمارات»، مضيفًا: «الصبح كان أحمد رفعت، هيجي يمضي معانا بعد ما اتفقنا مع نادر شوقي على كل حاجة». وتابع: «الساعة واحدة ونصف اتنين بليل. جاتلي حاجة في دماغي عن الخناقة بتاعة جنش وأحمد رفعت، الله يرحمه، في مباراة ببطولة أفريقيا وأحمد لم يلعب مع فيوتشر في ال 6 شهور الأولى في الدوري لأن الدوري ابتدى في شهر سبتمبر وانتقل للوحدة» وواصل: «جت حاجة في دماغي هل مباراة فيوتشر مع الفريق الأفريقي، كانت في موسم 2022- 2023 أم الموسم اللي قبله، هتتحسب في أنهي موسم، هو بالفعل لم يشارك في الدوري». وأكمل: «المباراة لو اتحسبت من الموسم اللي قبل 2022 -2023 مفيش مشكلة يلعب في الأهلي، ولكن لو اتحسبت في الموسم ده، مينفعش يلعب في أي نادي تاني غير ناديي فيوتشر والوحدة، لأن انتقاله للأهلي سيكون الثالث». وتابع: «كلمت الكابتن محمود الخطيب، الساعة 2 بليل وقولتله (المباراة دي هتتحسب تبع أي موسم، لأنه لو رجع عندي مش هيلعب تاني، مينفعش يلعب)، وكلمت نادر شوقي، قولتله (لازم نوقف كل حاجة لحد ما أسأل اتحاد الكرة مباراة فيوتشر في افريقيا كانت تبع أنهي موسم». وأتم: «سألنا اتحاد الكرة وبالفعل كانت هذه المباراة في نفس الموسم، لذلك فشل انتقال أحمد رفعت، إلى الأهلي».
