على سريره تجلس تبكيه، تصطف حولها السيدات يهدئنها ب«شدّى حيلك.. مات شهيد»، كلماتهن كأنها علقم تتجرعه، قالت لهن: «من 6 أيام بقولكم سمعت صوت صراخ ابنى في ودانى يستنجد: (إلحقونى)، كإنى شايفاه قدامى وهو مختفى، كذبت قلبى إنه في خطر، وقلت هيرجع، بس مرجعش سليم، رجع جثة هامدة مضروبة 10 طعنات».. وتعود إلى بكائها المتواصل: «صديقه- بمعاونة حارسة عقار- استدرجوه وخنقوه، بعد تسديد الطعنات، كإنها مش هتموته!، عشان يسرقوه». ابنك مرجعش لحد دلوقتى واحنا بعد الفجر ضيق حال، اضطر «حازم»، ابن ال18 عامًا، يوم السبت الماضى، للخروج للعمل على «توك توك» يمتلكه أخوه رغم تحذيره له قبل سفره بأيام: «ماتخرجش بيه، عشان أنا صلحته»، وتقول والدة الشاب إنها ركبت معه من منزلها في شبرا الخيمة بالقليوبية، وتوجهت إلى منزل أمها، القريب منها: «عشان أقعد معاها يومين لأنها مريضة»، وهذا كان آخر مشوار، وتلك كانت تفاصيل آخر مكالمة تليفونية لها مع الابن: «كلمته في التليفون الساعة 10 بالليل، قلت له: خلص شغلك وروح على البيت، عشان محدش يإذيك». الابن «حازم» اختفى من وقتها، وأمه تُبدى ندمها: «نسيت اسأله زى ما تعودت: إنت فين دلوقتى، قريب ولا بعيد عن بيتنا؟!» لأنها حين عاودت الاتصال به من جديد: «عشان أعرّفه إنى كلمت أبوه، وهو منتظره في البيت»، وجدت تليفونه مغلقًا، بعد أن أوصت الزوج كأن قلبها يشعر بالخطر: «لا تنام من غير ما ييجى الواد وتطمن عليه»، ليقول لها في اتصال تليفونى آخر: «ابنك مرجعش لحد دلوقتى واحنا بعد الفجر». تركت والدة «حازم» منزل أمها، وتوجهت إلى بيتها، أقدامها تحملها في صعوبة، والشارع خالٍ من المارة، والحركة هادئة، وصراخها مسموع، ويفزع جيرانها، وهى تضرب بيدها صدرها: «الواد لما كلمنى، كان مُكبر الصوت مفتوح، حد كان جنبه»، ولا تهدأ، وزوجها يقول لها: «اصبرى.. الغايب حجته معاه»، فهى تعرف: «ابنى روحه في تليفونه، لا يمكن يطيق إنه يفصل شحن، ده كان بييجى البيت مخصوص من آخر الدنيا يشحنه، ولو قاعد في البيت مش بيسيب التليفون من إيديه»، وتقولها في وجهه: «الواد جرى له حاجة صدقنى!». 3 أيام مرت على الاختفاء الغامض، ودموع أم «حازم» تملأ عينيها: «إنت فين يا ضنايا؟!»، ليتلقى أخوه الأكبر «أحمد» اتصالًا من رقم مشفر «مجهول»، يقول له المتصل: «لو عايز التوك توك بتاعكم، هتلاقيه في منطقة سوارس بقليوب»، ويُستفز شقيق الشاب: «عايز أخويا مش حاجة تانية»، ويُغضبه المتصل: «لا لا كده كتير قوى»، ويُغلق المكالمة، ثم يعاود الاتصال بعد ربع الساعة، ويُسمعه صوت أخيه يستغيث: «إلحقونى»، ويغلق المكالمة، والقلق يأكل قلب أسرة صاحب ال18 ربيعًا. ولا الإعدام هيكفينى عشان قلبى يهدأ وداخل قسم ثان شبرا الخيمة، رئيس المباحث ومعاونوه يستمعون إلى تفاصيل المكالمة، ويكثفون تحرياتهم مع تقديم والد «حازم» بلاغًا باختفائه، ووالدته في منزلها يحيط بها أقاربها، وتقول لهم: «ابنى بيصرخ سامعاه بودنى، حاسّة بشكة جامدة في قلبى»، وتتوجه وحدها إلى مشرحة زينهم في القاهرة، بعد محايلة على العاملين: «دخلونى أبص في التلاجة يمكن الاقى ابنى»، وبعد 3 ساعات عادت إلى المشرحة، وتحكى: «المباحث قالولى: روحى لوكيل النيابة عايزك، ولما قابلته قالِّى روحى تعرفى على ابنك، قلت له: لسة راجعة من هناك وملقيتوش، ولما رجعت تانى لقيت ابنى، كأنه مرضيش يدخل وأنا موجودة من الأول». وتقف الأم أمام جسد الابن، وتنهار حين تراه عاريًا إلا من ملابسه الداخلية، وفى صدره ورجله 10 طعنات، وعلى رقبته آثار خنق: «خنقوك عشان يتأكدوا إنك مت، كل الطعنات دى مش هتموتك؟!» لتعرف من زوجها أن «محمد»، أعز أصدقائه، استدرجه إلى منزل حارسة عقار في منطقة البساتين، وأنهيا حياته، وألقيا بالجثة طيلة الأيام ال6 الماضية بعقار تحت الإنشاء، وقبل أن يُغشى عليها، رددت: «رموه الكلاب تنهش فيه». «العريس أهو».. أم «حازم» تزفه في جنازته، بحضور المئات من جيرانه، الذين يطلقون عليه «شهيد الغدر»، وتقول من بين كلماتها الحزينة: «نار قلبى مش هتبرد إلا بالإعدام»، كأنها تمحو ما قالته: «ولا الإعدام هيكفينى عشان قلبى يهدأ، ده ضنايا أحن اخواته»، وتكمل: «إحنا شاريين توك توك بالتقسيط، وعلى قد حالنا، ابنى معملش حاجة لصاحبه ولا للست، هُمّه اللى قتلوه يبقى يتعدموا». تفاصيل القبض على المتهمين تفاصيل الواقعة تكشفت لأجهزة الأمن في القاهرة والقليوبية، بعد تلقى بلاغ بالعثور على جثة شاب يحمل بطاقة هوية بعقار تحت الإنشاء، ووالدته تروى: «ابنى كان بيحط بطاقته في جراب الموبايل، خدوا التليفون، وحطوا البطاقة جنبه، وخدوا التوك توك، وباعوه لراجل بلغ انه اشترى التوك توك دون أوراق، والمباحث توصلت للجناة»، وتضيف: «تأكدوا من موته بالخنق لأنه كان هيتعرف عليهم، والمتهم الأول كان عايز ياخد التوك توك من ابنى قبل كده ليضحك عليه أنه اتسرق منه».
