-هتيجى تخطبنى إمتى أنا سيرتي بقت على لسان كل فراعنة الحتة وكدة ماينفعش أبويا كدة هيدفنى في أقرب مقبرة تقابله. -طول عمرك مستعجلة كدة ما أنت عارفة أن ظروف البلد والشغل وحشة وبنى الأهرامات ماعدش بيكسب زى زمان وبعدين دا كل الموظوع 400 سنة كنا بندرس فيهم بعض! -يعنى لما أبويا يصر يجوزنى رمسيس ابن عمي أعمل أنا إية بقى؟! -بقى أبوكى مش لاقى غير الواد المبرشم دا دا كل يوم بيشم كلة تحت كوبرى أكتوبر -ماأنت عارف إنه عنده ميكروباص مشغله خط الهرم ومن سااعة ما الأجرة غليت وهو شايف نفسه، وكمان ناوى يشترى ميكروباص تانى -خلاص ياستى ما أنا عارف إنى مش هخلص من زنك حددى ميعاد وبلغينى على الموبايل وأنا هلبس الحتة الفرعونى اللى على الحبل وأجى أخطبك -بجد؟ عموما هو مستنيك النهاردة بالليل يابتاح -إية دا بقى ؟! أنتوا عاملين رباطية عليا ؟!.. أمال إية حوار رمسيس دا بقى؟.. عموما ماشى أنا جاى النهاردة أشرفك بالفيسبا بتاعتى منزل، جود باى ياأيجى عمرى منزل ايجي والد ايجى: بص بقى يا بتاح احنا صبرنا عليك كتير مشحطط البت وراك بقالك 400 سنة وكل يوم أقول هيتصلح حالك وتجيب هرم نجوزكم فيه بس مفيش فايدة فيك، داير تخمس لى بالفيسبا بتاعتك وتزف اصحابك الفراعين الصيع وعلى كدة بتاح: ياعمى ماانت عارف أن حال البلد واقف ومفيش فلوس...أعمل إية يعنى؟! والد ايجى:عموما أنا قلت لك اللى عندى قدامك 100 سنة كمان لو ماجبتش الهرم اللى يليق ببنتى يبقى فركش وكل واحد يروح لحاله بتاح:ياعمى ادينى فرصة أنا قربت أجيب المسلة.. وخلاص ربنا هيكرمنا ونبدأ نبنى الهرم التالت هو صحيح هرم صغير بس مكش مشكلة أهو هيجيب قرشين لزوم الفرح وكلها عشرين سنة ونخلصه والد ايجى: فرصة تانية اية وهرم تالت اية وبعدين انا بنتى ماتتجوزش في مسلة في المساكن الشعبية أبدا انت ماشوفتش جوازات بنات عمها؟!.. عاوز الناس تضحك عليا ولا اية؟ بتاح: بقولك اية ياعمى انا حفيت وجبت وسايط الدنيا علشان اعرف احجز في مسلات المحافظة وانت جاى تقولى المسلة مش نفعة! والد ايجى: انت عاوز بنتى تسكن في مساكن شعبية وسط فرعونيات بلطجية يضربوها كل يوم؟ بتاح: بص بقى يلاعمى هو دا الموجود مش عاجبك جوزها رمسيس وأهو ابن عمها وأولى بيها والد ايجى: قشطة غور ياد من هنا.. مبروك عليك رمسيس يابت
