قال الإعلامي تامر أمين، إن النجومية لها ثمن كبير سواء في مجال الفن أو غيره، معقبًا «الشخصية العامة أو النجم بيكون له ثمن، وزي ما بيفرح بالفلوس والشهرة والأضواء لازم يعمل حساب للنجومية، ولازم يكون عارف إن أفعاله وتصريحاته محسوبة عليه». وأضاف "أمين"، خلال تقديمه برنامج "آخر النهار"، المُذاع عبر فضائية "النهار"، «الفنانة شيرين عبد الوهاب تحير أي حد، والواحد ما يعرفش إذا كان يحبها بصوتها التحفة وقدرتها علي الطرب، وهي حاجه تشرف إن عندك صوت مصري في الغناء كويس، وتحير إنك ما تعرفش تكرهها أو تزعل منها بسبب أفعالها وكلامها ولسانها اللي طول الوقت بيقول كلام مش مسئول يسيء لنفسها وللناس وللبلاد». وتابع: «شيرين خبطت قبل كدا أكتر من مرة، وواضح إنها غير قادرة علي ضبط لسانها وكلامها في المسرح والحفلات، وواضح إن دا مشكلة عندها، وهي بتطلع تغني زي الفل، وتتكلم في النص بين الأغاني تحصل مصائب». وأوضح: «آخر هذه المصائب كانت في حفلة رأس السنة، وطلعت شيرين في الحفلة بقصة شعر وقالت القصة دي تكلف 60 ألف جنيه، وأنا مش عارف ايه إللي يكلف 60 ألف جنيه، والموضوع محتاج مقص بس، لكن دي مش القضية كل واحد حر في فلوسه»، متابعا: «إللي مش حر فيه إننا نسيئ لبلادنا والحتة دي بالذات بتجيب لي حساسية والضغط بيضرب في دماغي». واستطرد: «شيرين أثناء الحفلة، والناس بتحييها قالتلهم والله أنا خسارة في مصر، والكلام دا يتقال بين الصحاب في الهزار، إنما مينفعش تقوله في المايك، علشان مفيش حد خسارة في مصر، وأثناء الحفل فيه حاجه وقعت علي الترابيزة والإزاز اتكسر والموضوع عادي، تقوم شيرين في المايك تقول عادي عادي يا جماعة انتوا في مصر طبيعي إن دا يحصل». وتابع: «لا يا شيرين، لو عايزة كان فيه أكتر من حاجه إنك تخرجي من الموقف، بس مكنش ينفع إنك تهيني بلدك أي كان نيتك، وأنا ليا ظاهر الفعل، وظاهر فعلك إساءة للبلد، ومصر هي إللي خسارة في ناس كتير».
