إيهاب شوقى 38 سنة مهندس زراعى علاقة العلاوة بالأسعار طردية، كل ما تيجى علاوة جديدة بتزيد معاها الأسعار، المفارقة إن الناس بقت بتتشاءم لما بتيجى العلاوة السنوية، لأنها بقت مرادف لزيادة الأسعار، وفى الآخر ماحدش بيشعر بالعلاوة، أما الأسعار فزيادتها بتكوى الجميع. ولو خيرونى بين العلاوة وتثبيت الأسعار، أكيد هاختار تثبيت الأسعار، لأن التجربة أثبتت أن كل زيادة بتبقى أكبر من العلاوة، يعنى كل زيادة بتبقى أكبر من اللى قبلها. محمد السيد 45 سنة نقاش الحكومة بتضحك على الموظفين بالعلاوة دى، واللى بيدوهولهم باليمين، بياخدوه بالشمال، وفى الآخر بتيجى على دماغنا احنا، لأن الأسعار بتزيد، وكل حاجة بتغلى، واحنا اللى بننكوى بنارها، ياريت الحكومة تثبت الأسعار وتوفر علاوتها. ربيع محمد 36 سنة موظف حكومى علاوة الحكومة مالهاش لازمة، ما أنا موظف حكومى، ومش باحس بالعلاوة غير لما الأسعار بتزيد، وياريتها بتزيد على قد العلاوة، لأ دى كل مرة بتزيد أكتر، وبتصعب الدنيا علينا أكتر، لو ثبتت الأسعار يبقى أحسن من 100 علاوة. عماد سليمان 32 سنة موظف بشركة سياحة الموظفون بياخدوا العلاوة باليمين، وكل الناس بيدفعوها بالشمال تانى بعد ما الأسعار بتزيد، وسياسة الحكومة هى المسئولة عن كده، واللى بيضر أكتر هم الموظفين اللى بيشتغلوا فى القطاع الخاص، والناس اللى بيشتغلوا باليومية، والأرزقية، دول مبياخدوش علاوة، وبتشويهم زيادة الأسعار، وللأسف هم النسبة الأكبر من الشعب.