أخيراً بعد طول انتظار وبعد فرار صاحبى للحاق بالقطار وأنا فى الموقف ونايم واقف زى الحصان جالنا الفرج وهل هلال المدعو توك توك، وارتفع صوت صائح كمكبر صوت محشرج.. "ديروت مريوط شخبوط". الحقيقة كنت عايز مترجم من سرعه تدفق الأسماء من أفواه المنادين، وأنا غريب عن المدينة وليست لى دراية بالمصطلحات، قلت فى نفسى ربما سبب خروج الأسماء مبهم هو انتقال أفواههم بجوار ودانهم عندما ينادون مما يؤثر على مخارج الألفاظ فتطاير وتطيح بعض الحروف بالكلمات. توجست خيفة وقلت فى نفسى الخوف يركبونا على هذا النمط خلف خلاف، أصل العملية ملهاش مقياس وكله بالأمانة حابس أنفاسه والهواء، وما أدراك بالهواء صافى منعش للأنفاس، وبيعمل شغله من الساس إلى الراس، وانت وحظك.. ياطلعت معاه -السواق- فرفشة أو تنداس بالمداس انت وحظك، بس المهم نوصل والحال هو الحال والمحتاس هو محتاس، ولو علقوا فى فردتى شنباته زوجين أقراص، ووضعوا فى بق السواق بوابه وكام متراس، ولو قفلنا السيل المنهمر من صاحبنا قائد الميراج لم ترحمنا سرينته.. بلبل أو صوت كناريا، لا والله كان واضع صوت جاموسة للسرينه.. قد إيه حلوة الثقافة والتراث والارتباط بالجذور والانتماء.. أعزكم الله. وينبعث صوت غجرية من كاسيت.. "محلاها البنت بهية وهى ماشية متغمية ماشيه الرجالة الحرامية" قد إيه كانت الرقة والإحساس والمتعوس المنتشى بلا إحساس فى ناس بتشترى فكر وناس بتلبس عقلها قرطاس، أنا زهقتكم هقعد ولسه المشوار طويل ويادوب بنقول: ياهادى ياكريم انا اتعديت وبقيت قليل الزوق، وسامحونى على الهلوسة. اركب ياعم. بس مليش مكان. اركب مش هتدفع. بلاش احسن تاخد مخالفة. دة كلام.. أنا بعرف ادفع وأزوغ كمان. ركب الكحيان الغلبان وانحشر وخد الشنطة على ركبته وبدأ يشم عادم متسرب من الشكمان وفردة الاستبن فوق رأسه. توكلنا.. طلعت حلوة من السواق.. إيه الإيمان ده كله، وبعد خطوتين واحد جاى يجرى.. أخلص واتشعبط. بعض الأصوات تنبعث على استحياء رهبة وخوفا من بطش السجان، اقصد السواق.. هى دى علبة سردين، ولا تخشيبة مساجين، ولا احنا فى طابونة علشان رغيفين؟!! اتشعبط ياعم وخلصنا وادفع المعلوم.. ناخد مخالفة ولا مليون كله تمام التمام.. فى سرى ولا يهمك ياغلبان ياعديم اللسان. السواق اركب ولا عايزنى اشيلك من على الأرض كمان؟ طريق السلامة ياعايدة.. مين هى عايدة؟ والله ماعرف! آسف للإطالة وسأوافيكم إن كان لى أجل وقدر الله بالجزء الثالث لطول الرحلة.. ودمتم بخير.
