محمد دياب ل"ع المسرح": مكنتش غاوى غناء ولا تمثيل وأول أجر ليا كان 45 جنيها.. وزواجى أهم نقطة تحول فى حياتى وبعد أمى مبقاش ليا حاجة فى الدنيا.. ويؤكد: أبويا كان دكتور وأنا مكملتش علام.. والتمثيل جانى بالصدفة

قال الفنان محمد دياب، "أنا مكنش فى دماغى أن أغنى وأمثل ولا كانوا فى خطتى ولا تخطيطى، كان نفسى أكمل دراستى عادى واشتغل شغلانة تخلينى اكسب قوت يومى وأكل وأشرب وألبس زى أى حد، لكن القدر أراد إن أول شغلانة اشتغلها هى الغناء".
وأضاف محمد دياب، خلال حواره ببرنامج "ع المسرح"، مع الإعلامية منى عبد الوهاب، على قناة الحياة، إنه أول ما غنا كان عمره 16 سنة فى الشارع فى إمبابة وكان أجرى 45 جنيها، وكنت سعيد بشكل كبير وكلت بيهم كلهم أنا وأصحابى، واللى أسعدنى أكتر إنى نجحت فى الفرح ده وأخدت عرابين 3 أفراح تانيين".
وتابع، 45 جنيها كان رقم كبير كنت أوحش فيه علشان أجيب جزمة وبنطلون، ودقت طعم النجاح من أول يوم، مؤكدا أنا من اليوم ده ساعات بتكسف أطلب حاجة من ربنا علشان أدانى أكتر من اللى كنت بحلم بيه، وانا شايف إن مفتاح الحياة الصبر".
وأكد محمد دياب، من أهم نقطة التحول الإيجابية فى حياتى إنى أجوزت، وحولت فيا حاجات كتير وزودت الإيجابيات عندى وقللت السلبيات، وكان فى محطات فى حياتى المهنية كانت نقطة تحول، وبعدها لما مثلت".
وأضاف دياب، أن وفاة والدته كانت نقطة تحول سلبية، وحسيت إنى متعرى بزيادة ومبقاش ليا حاجة فى الدنيا، وكنت سعيد أنى شغال عشان أسعدها وكنت خايف أنها تمشى وهى مش مطمنة، وهى كانت مريضة وتعبت معانا عشان تربينا، وكنت عاوز أعوضها وافرحها، وكانت كلمتها أتقل من مليون راجل".
وذكر دياب، انا شخص طيب ومؤدب، وأنا لا أدعى الموهبة العظيمة، وقفشتى وقلبتى وحشة لأنى حمول جدا ولما بنفجر ببقى عامل زي القنبلة، ومبحبش نفسى لما بتعصب، وانا لما كبرت مبقتش أتكسف من أى حاجة عملتها حتى لو كانت مصيبة، وفى السنوات الأخيرة نسبة الكدب قلت معايا".
وتحدث دياب، عن سبب تسميته ب"دياب" واسمه الحقيقى محمد مبروك أبو الحديد على، قائلا: "أنا أخ غير شقيق لإخوة عائلتهم ملقبة بدياب، ووالدى انفصل عن أمى وانا عندى سنة، ومتربى معاهم ومعروفين بآل دياب وأنا بقيت دياب نسبة ليهم، وأخذت اللقب منهم".
ولفت إلى أن والده توفى فى 2004 قبل والدته ب 4 سنوات، كنت بحب والدى وكان أقرب صاحب ليا وكنت بحكى معاه وبفضفضله على كل حاجة، وكان حكيما ومثقفا وواعيا، وكان طبيبا بشريا وشخصا موسوعيا، وانا مكملتش تعليمى".
وأكد: أهم شىء أصر عليه والدى وانا مكنتش عاوزها وعملتها إرضاء ليه أن أحصل على شهادة الثانوية العامة ومدخلش معهد موسيقى، وعلشان عملتها غصب عنى مكملتش الثانوية العامة".
وقال دياب، من وقت ما نجحت وكل ما تديق عليا أبص للسماء وأقول لربنا انا بتاعك، وقصة حياتى هسميها "موال الصبر"، ودى كانت أول أغنية غنيتها فى مايك فى فرح".
وأكد أن والدته كانت أول شخصية مؤثرة فيه وحفزته، لانها من الناس اللى غرست فيا الصبر بالإضافة للظروف التى عشتها، وجعلت العوز يقوينى، وكل اللى حلمت بيه أخدت أحسن منه".
وذكر دياب، التمثيل جاءنى بالصدفة، وبيجينى عروض تمثيل قبل ما أتشهر كمطرب، لأن أصدقائى مخرجين وشافت إنى أمثل، وبعد ما اتشهرت كمغنى مش شايف إنى بعرف أمثل، ممكن أمثل فى كليب مثلا، لافتا إلى أن الفنان محمود عبد العزيز الله يرحمه طلبه فى دور فى مسلسل، وقالى انت بتعرف تمثل، وانا مكنش عندى ثقة فى نفسى"، ومبحبش أزاحم فى حاجة معرفش فيها.