الرئيس السيسى خلال افتتاح المنتدى العالمى للتعليم العالى: التعليم أساس بناء الدول ويحتاج إلى قدرات اقتصادية.. ويؤكد: "هنفضل نقاتل من أجل المعرفة والتعليم الحقيقى فى بلادنا".. ويحذر من الفكر المتطرف.. فيديو

أكد الرئيس عبد الفتاح السيسى، أن المتحدثين فى ندوة "تحديات وظائف المستقبل" منظورهم عالى، خاصة حديثهم عن العلوم والمعرفة على مستوى العالم والتقدم ومستوى التعليم المنتظر خلال السنوات المقبلة، متابعا: "هتكلم من منظور تنفيذى.. من منظور دول منظمة التعاون الاسلامى.. لدينا 50 دولة يا ترى جودة التعليم ايه؟.. التعليم الجيد حق من حقوق الانسان مش مجرد التعليم ولكن التعليم الجيد".
وأضاف الرئيس السيسى، خلال تعليقه على الجلسة النقاشية: "تحديات وظائف المستقبل"، ضمن فعاليات المنتدى العالمى للتعليم العالى والمقام بالعاصمة الإدارية الجديدة: "الطالب اللى قال أنه كان بيدرس وقال هخلاص ويشتغل في شركته.. ده من خلال جودة التعليم المتاح له.. تحقق له فرص عمل ومشاركة حقيقية.. هتكلم عن التعليم فى دول منظمة التعاون الاسلامى.. ما هو التعليم الجيد المتاح؟.. المعرفة الحقيقية وجودتها كنز وثروة مخفية.. ولكن للحصول على التعليم الجيد لابد من قدرات للحصول عليها.. قدرات اقتصادية للدول تقدر توفر التعليم ده.
وأوضح الرئيس عبد الفتاح السيسى، أن الفكر المتطرف كان سببا مباشرا في تعطيل خطط تطوير التعليم في الدول الإسلامية، قائلا: "في العالم الإسلامي دخلونا في متاهات كتير جدا، جاهل يؤدى الى الاصطدام مع الواقع وحياتنا ومبقناش قادرين نركز في تحقيق لمجتمعاتها استقرار لانجاح الخطط المختلفة.. حجم الاستقرار والقدرة الاقتصادية في دول العالم الإسلامي لتعطي معرفة وجودة حقيقة، يبقا عندي 25 مليون في مصر علشان أديهم تعليم بجودة حقيقة عاوز أرقام مش متاحة هنا والسبق هنبقا دايما فيه متأخرين".
وتابع الرئيس السيسى: "الخريج المتعلم عندنا اذا كان مطلوب بالمعايير العددية لو مليون يبقا نحتاج الى 100 جامعة، أما عن الجودة فنقوم من خلال التوأمة مع جامعات عالمية علشان يعلمونا وده موضوع احنا نقبله بكل ود، إننا نتعلم من غيرنا ونتعلم كويس علشان ناخد مسارنا ونحقق لشبابنا في مصر ومنظمة المؤتمر الإسلامي"، قائلا: "علشان نقدم تعليم جيد بتتكلموا على 45 % من شباب المنظمة في التعليم ، لو قلنا فيه اكثر من مليار بيتعلموا يبقا فيه 400 مليون بيتعلموا يا ترى احنا بنقدملهم تعليم عامل ازاي وثقافة التعليم في بلادنا عاملة ازاى؟..فيه معارف وعلوم ملهاش أشغال بالحجم الذى يتخرج فيه الشباب".
وشدد الرئيس السيسى، على أن التعليم يحتاج عوامل زمنية أكبر بكتير من أى خطط.. بتتكلم في 20 سنة علشان تشعر المجتمعات بجودة ونتائج هذه الجودة ، وهل مجتمعاتنا ستتنظر؟، قائلا: "شعار التعليم للجميع.. لكن يا ترى التعليم للجميع كان جودته بنفس المستوى اللى بيقدم في دول أخرى مثل أمريكا وأوروبا افتكر بمنتهي التواضع والوضوح لا مكنش كده".
وأضاف الرئيس السيسى قائلا: "السرعة في التقدم أصبحت عالية جدا، متابعا: "يعنى النهاردة الثروة الصناعية الأولى خدت من 120 ل 150 سنة.. والثورة الرابعة والخامسة من 20 ل 30 سنة.. احنا بالطريقة عقبال لما نحصل هنحصل امتى؟.. كده مش هنحصل"، وتابع: "أنا هنا بقول لمصر احنا جادين بإرادة لا تلين من أجل مجابهة التحديات واللى منها التعليم.. التعليم الحقيقى أساس البناء للدول.. ولكن يجب أن يكون بجودة حقيقية زى الجامعات العظيمة اللى موجودة في العالم.. انتم بتتكلموا عن حقوق الانسان وانا بتكلم معاكم عن حقوق الانسان.
وقال الرئيس السيسى في نهاية تعليقه: "عايزين تساعدونا ساعدونا أن يكون لدينا تعليم حقيقى زى اللى موجود بمعاييركم ومستواكم.. علشان ده حق من حقوق الإنسان.. الجامعات العالمية تحتاج إلى اختبارات لقياس مستوى الطلاب قبل الدخول إليها.. لو التعليم بتاعنا متواضع مش هنقدر ندخل.. حبنا نعمل في بلادنا هنا جامعات عالمية.. وهنعمل هنا.. هنفضل نقاتل من اجل المعرفة والتعليم الحقيقى في بلادنا هنا".
وتحدث الرئيس السيسى قائلا: "إلى العالم الإسلامي.. انتبه للفكر المتطرف الأحمق اللى هدف منه يدمرك ويدمر مستقبلك.. الفكر الجامد والمتطرف لتدمير الشعوب ومستقبلها وحياتها.. الإسلام ملوش علاقة بتدمير حياة الشعوب.. المواهب متساوية ومفيش أمة ربنا خلى المواهب والعقول أكبر فيها من التانية.. العقول متساوية ولكن الموارد مختلفة".
وقال الرئيس السيسى: "بنحط 100 فرصة تعليم مجانية في الجامعات العالمية.. مساهمة متواضعة من مصر.. 100 فرصة تعليم.. فيه أكثر من كده ممكن نعمل.. من خلال تضافر الجهود ويكون فيه صندوق التعليم فيه مليارات الدولارات لتعليم الموهوبين.. يارب مكنشى طولت عليكم سعيد بيكم.. واحنا كمان عايزين نبقى معاكم.. ساعدونا".