كان يرتشف كوب الشاى الساخن بصوت مسموع وهو متربع كعادته فوق الكنبة.. فتح باب الغرفة وخرج ابنه مجاهد وهو يفرك عينيه.. صباح الخير يا حاج. وهو يشيح عنه بوجهه.. صباح الخير يا بنى.. ربنا يهديك.. أنا مش عارف أمتى ياحاج بس هترضى عنى..؟؟ الأول يرضى عليك ربنا.. صلاة ولا بتصلى إلا يوم الجمعة.. ولا شغله ولا مشغلة إلا شغلانة الصياعة.. أرضى عنك إزاى..!! قطع حديثهم صوت التلفاز.. وما أن سمع مجاهد موسيقى المقدمة وصوت المذيعة حتى أسرع وهو يمسح وجهه وجلس متربعاً بجانب والده.. وسع شوية ياحاج ربنا يخليك.. خير يا بنى.. سياسة برضه..؟؟ استنى بس ياحاج خلينا نمتع نظرنا.. نظرنا..!!؟ طيب يا ابنى ناولنى النظارة الله يسترك. ظهرت الراقصة الشهيرة والمذيعة ترحب بها.. مين دى يامجاهد..؟؟ دى رقاصه ياحاج.. رقاصه..!! وإيه اللى مطلعها علينا بدرى كده..!! لا ياحاج دى حلقة معادة من رمضان اللى فات.. رمضان..!! وإيه علاقة رمضان بالرقصات..!! إيه المسخرة دى..!! قطع حوارهم صوت المذيعة وهى تسألها.. هل ابنك لا يشعر بالخجل فى المدرسة أن أمه رقاصه.. رفعت حاجبها وهى تقول بثقة.. يخجل..!!؟؟ ده يفتخر بأن أمه رقاصه.. صاح مجاهد الله أكبر.. قشطه ياحاج.. قشطه إيه يازفت..!! إيه الكلام المنخوليا ده..!! وهو يكور بيديه ويشير بهما يمينًا ويساراً.. أكيد يفتخر.. لازم يفتخر.. تصدق بالله يامجاهد.. أنت واد صايع ومافيش فايده فيك.. فى دخول أم مجاهد.. فيه إيه بس ياحاج هو أنت كده دايمًا جاى على الواد اللى حليتنا.. وبدون وعى نظر مجاهد لأمه بجانب عينيه وهى تجلس وهو يبتسم ابتسامة خبيثة.. نظر إليه والده وابتسم وهو يهز رأسه فقد فهم ما دار بذهن ابنه.. ما تقومى تحضرى الفطار لمجاهد يا حاجة.. شكلكم بتوزعونى.. ماشى.. لما أشوف أخرتها معاك أنت وأبوك، فيه سؤال كنت دايمًا نفسى أسأله لك.. أنت اتجوزت أمى ازاى..؟؟ أخذ يقهقه.. أيوه كده ياحاج فكها شوية.. يا بنى أنت عارف أنى من الصعيد الجوانى.. جدتك هى اللى اختارت أمك.. سألتها حلوة ياحاجة..؟؟ قالتلى زى العسل يابنى.. ليلة الدخلة أول ماشفتها قلت فى سرى ربنا يجازيكى يامه.. الله يخرب بيت شورتك.. وبعدين لقيتها طيبة وبنت حلال.. الدنيا مشيت.. بس تعرف يا واد يا مجاهد.. الشهادة لله.. أنا زهدت فى صنف الحريم على أيد أمك. أقفل يا مجاهد المخروب ده وهات الجرنان نقراه.. أخذ أبو مجاهد يتصفح الجريدة وفجأة قال.. هو فيه إيه النهاردة..!! هو يوم الرقصات..!! فيه إيه ياحاج..؟؟ إللى فيه يا مجاهد قنوات مخصوصة للرقص الشرقى فى التلفزيون..؟؟ أيوه.. ليه..؟؟ الخبر بيقول أن السيد اللواء رئيس القمر نايل سات بينفى أن قناة الرقص دى تابعة له..؟؟ ألا بالمناسبة ياحاج.. هى المناصب فى بلدنا بتتوزع أزاى وعلى أى أساس..؟؟ مش عارف يابنى والله.. اللى أعرفه أنها أرزاق..!! قنوات للرقص..!!؟ بقى ده إعلام بلد عاوزة تنضف وتتطور..!!؟ هو أنت بقيت من الأخوان والسلفيين ولا إيه ياحاج..؟؟ هو يعنى اللى يقول كلمة الحق اليومين دول يبقى كخه..!!؟ وسعادة اللواء بيقول إن القناة المتخصصة فى الرقص الشرقى مالهاش تردد عنده وأن بعض الترددات بيتم ضبطها وتظهر وكأنها تابعة له.. ليه لأ.. ممكن ياحاج تكون لزقت فى النايل سات وهى بتهز أو وهى بتتحرش بيه..؟؟ كل شئ جايز..؟؟ يعنى القنوات اللى كانت بتقول لا إله إلا الله قفلوها فى يوم وليلة وجات عند هشك بشك ودورى ياحكومة على الزبده..!!؟ واسمع ياسيدى.. بيقول.. إن الرقص الشرقى فن وإذا كان المحتوى المعروض بالقناة يتعارض مع أى شخص فعليه اللجوء إلى القضاء.. ولكن إذا كانت لا تحتوى على مشاهد خادشة فلا مانع منها. القضاء وخادشة.. حاشا لله..!!؟ إيه يعنى صدور عريانة وأفخاذ وبطون مكشوفة ومؤخرات بتلعب شمال ويمين.. خادشة.. ده كلام..؟؟ ماعندوش حق..!! وفن أكيد فن..؟؟ يعنى لو ماكانش فن يكون إيه..؟؟ يا سلام يا واد يا مجاهد لو واحد بس يكون عنده جرأة ويقول أن اللى بيتفرج على رقاصه بيتفرج عليها من باب الفن.. فن إيه ياحاج ربنا يستر علينا. ملأت قهقهة أبو مجاهد المكان وهو يقرأ بصوت متقطع.. شوف بقى النكتة.. رفضت الراقصات القدامى ظهور هذه القنوات.. لأنها تسئ للمهنة، لأن الراقصات غير متخصصات..!! شفت ياواد يامجاهد حتى الرقص محتاج تخصص..!! أكيد يابا الحاج.. أحلى تخصص.. ورفع يديه ليكورها.. بقولك إيه يا مجاهد.. احترم نفسك واتلم.. وكمان بيقولوا أن بدل رقصهم مش حشمة..؟؟ هما الرقصات أيام زمان كانوا من المحتشمات ياواد يامجاهد..؟؟ حشمة الحشمة ياحاج.. كانت الرقاصة بتبين صدرها وبطنها وظهرها وأفخاذها وبس..!!؟ تصدق ياحاج.. بلدنا مليانة دلوقتى رقصات من روسيا ومن غيرها.. أكيد بتهزر..!! لا والله ياحاج.. يانهار أسود..!!؟ هو احنا خالصين باللحمة البلدى العريانة اللى عندنا لما يجيبولنا لحمة مستورده..!!؟ الموضوع أكبر من كده.. البلد مفتوحة على البحرى ياحاج.. بحرى..!! يعنى إيه..؟؟ ده ياحاج موضوع منعاص وعاوزله قعدة كبيرة. دخلت أم مجاهد وهى تبتسم وهى تقول ماشاء الله أول مرة أشوفكم مبسوطين ومروقين أيه الحكاية..؟؟ نظر إليها مجاهد وهو يضحك ويقول ألا أنت بتعرفى ترقصى يا حاجه..؟؟ نظرت إلية بدهشة وهى تقول تصدق بالله أنت واد معفن وأبوك عنده حق.. أنت باين عليك من كتر السهر انهبلت.. قالتها وهى تجمع الأطباق مرة أخرى وتعود بها للمطبخ وهى تقول خسارة فيك اللقمة.. آل رقص آل هى دى اللى ناقصة..!!
