اعتدل أبو مجاهد فى جلسته فوق الكنبة، وهو ينظر لزوجته من تحت نظارته وهو يتنهد بحسرة وهو يقول.. تصدقى بالله ياحاجة.. أنا عمرى ماسمعتلك شورة ولا رأى فى موضوع.. نظرت إليه بعيون يطل منها العتاب وهى تقول.. يعنى أن سكتنا تقول عمرك ماشورتى وأن أتكلمت تقول شورة الست لو فلحت بخراب سنة ولو مافلحتش بخراب العمر.. مش ده كلامك ياحاج..!! تصدقى ياحاجة موضوع الشورة ده فكرنى بحاجة دايما شاغلة بالى.. سلامة بالك ياحاج.. لا مش القصد.. اللى شاغل بالى ياحاجة مش لاقى حد يجاوبنى على سؤال هيجننى .. فايدة مجلس الشورى اللى عاملينه من أكتر تلاتين سنة أيه..؟؟ انتخابات واجتماعات ودورات وجلسات وملايين مالهاش عدد اتكلفت على الشعب الغلبان ولاعمرنا شفنا له شورة ولا فايدة ولا عايدة..؟ لأ ياحاج أزاى.. مرات الحاج أبو إسماعيل عضو المجلس دايما تشكر فى المجلس.. طيب ما لازم تقول كده ياحاجة ما الحاج أبو إسماعيل من يوم ماطلع على المعاش ورجع البلد هو وعيلته وفتح دوار أبوه العمدة وهو لاشغلة ولا مشغلة.. أكيد شغلانة المجلس دى جاتله من السما.. وشيلنى وأشيلك.. أبوإسماعيل له كلمة فى المنطقة وبينفع فى انتخابات مجلس الشعب. خرج مجاهد من غرفته وهو يفرك عينيه.. نظر إليه أبوه وهو يشيح عنه بوجهه.. طبعا سهران طول الليل فى الاجتماعات والكلام الفاضى وقعدت فى البيت زى الولايا لا شغلة ولا عمله..!! بصوت هادئ وهو يتجه للحوض لغسل يديه.. بكره ياحاج تتشرف بابنك مجاهد.. عضوية المجلس قربت والحلم مش بعيد. يا ابنى ارجع عن اللى أنت فيه.. ودور على شغلانة نافعة بلا انتخابات بلا تهريج.. ياجماعة..!! ما أنتو لسه بتتكلموا على الحاج أبو إسماعيل.. ياحاج.. المجالس دى سبوبة عسل.. بس أنا نازل فى انتخابات مجلس الشعب هو ده الطريق السريع المجرى.. أما الشورى فدى سبوبة الناس الغلابة..بيراضوا بيها اللى مالوش فى الشعب أهو ينزلوه فى الشورى وكله بالفايده وأهو شغلانة لأكبر عدد من رجالة الأحزاب والرتب والإعلاميين والحبايب والمحاسيب اللى فاتهم السبوبة الميرى أو مجلس الشعب.. كله ياحاج لازم ياخد نصيبه من التورتة. أنت خلاص مافيش فايدة فيك يامجاهد يا خسارة تربيتى فيك.. سمعها ابنه وهو يتجه لباب غرفته وهو يبتسم.. كانت أم مجاهد تستمع للحوار وهى حزينة لأن أبو مجاهد لايشاركها هى وابنها الفرحة بأن يكون مجاهد عضو فى المجلس.. حلم لم يطرق باب خيالها يوما. قطع حلمها الجميل صوت أبو مجاهد وهو يقول تصدقى ياحاجة لما مجلس الشورى السنة اللى فاتت ولع أنا فرحت بس الفرحة كانت ناقصة أنه مولعش واتهد فوق دماغ الأعضاء أهو كنا خلصنا منهم ومن قعدة الشوم اللى مامنها فايدة.. كلام فى كلام.. وفعل مافيش.. عندك حق ياحاج.. الست أم إسماعيل دى طالعة فيها ومتفشخرة أن جوزها عضو فى المجلس.. هو ده اللى شاغلك ياحاجة.. الظاهر مافيش فايدة. أخذ الرجل يتذكر وهو يشاهد يوما جلسة لمجلس الشورى منذ سنوات طويلة وهو يستمع لوزير الإعلام يومها وهو يزف للمجلس خبر إطلاق القمر الصناعى نايل سات وهو يقول أن مصر فى عهد الرئيس مبارك دخلت عصر الفضاء.. والأعضاء يصفقون ويهللون..!! يومها أخذ يضرب يدا بيد.. عصر الفضاء..!! يضحكون على من..!!؟؟ أننا لم نشارك بصامولة ولا بنفر فى هذا الموضوع.. ومرت السنوات ولاشفنا لاتقدم ولاتطور ولاصناعة ولازراعة ولاتعليم ولاصحة.. فشل فى فشل..!! كان صوت مذيع النشرة عاليا وهو يقول إن قانون مجلس الشعب والشورى الجديد يلاقى اعتراض من ائتلاف الأحزاب وأن الموقف متأزم ويدعو للانفجار.. سمعها أبو مجاهد فأخذ يحدث نفسه.. كان أفيد لو اعترضوا على وجود مجلس الشورى نفسه.. فايدته أيه ياناس.. ياعالم أنا هتجنن..!! بقول أيه ياحاج.. أنفجر أبو مجاهد فى وجهها وهو يقول .. لاتقولى ولاتعيدى كل شورك سوده وشورهم سوده ولو أستمر الفكر الأسود ده هتبقى حياتنا سوده.. اتسعت عين أم مجاهد وهى تنظر إليه بخوف وهى تقول .. اللى تشوفه ياحاج..!!
