زمن الحروف انتهى وللا هنسأل فين من أول السطر كام كلمة ورا حرفين وللا خلاص الكلام أصبح بدمع العين حتى غناوى الأمل واقفة هناك تستنى عالشطين ..................... يا شط بَعَدْ و غَرَبْ بُعْدْ السما عن لُقَانَا إمتى هترجع تِقَرَبْ وإمتى تصون الأمانة حمَِلْتَكْ هَمِى و فَرْحِى وحكيت لك ياما عَلَيا لا إنت اللى حفظت عهدى و لا قَرَيتهَا فْ عِينَيه قلبت ليه المواجع زَودْتْ ليه الحَزانَى .................... يا شط أملى الوحيد بلدى وغالية تنادى وأنا عشت عمرى بعيد بس خلاص م الليلة دى وَقَفْتْ على باب بلدنا خَبطْت قلت إنى راجع إفتح بيبان الأمل دا أنا من زمان بحلم مستنى لحظة لقانا ..................... لو كنت فاكر بُعَادَكْ فَرَقْ ما بينى وبينك اعرف بأنه لا يمكن مهما افترقنا وسِنِينَكْ إللى كتير بَعدِتْنَا كان البُعَادْ عالورق وأما تشوف الحقيقة هتلاقى قلبى حريقة مايطفيهاش غير رجوعى مكتوب عليا وعليك القُرْبْ بس دوانا .................. بيقولوا كلمة وطن مِتْكَونَة من حروف وإللى بيقرا الوطن لازم يحس ويشوف وإللى ماشفش الوطن هَيِمْلا قلبه الخوف وإللى يخاف م الوطن خوفه اللى راح يِخْنُقُه واقف هناك مكسوف وإللى انكسف من وطن أكيد بَدَالُه ألوف وإللى مص دم الوطن عمره ما غاث ملهوف وإللى يخون الوطن قوموا حَضَرُوا له كفن وإللى بيسرق وطن أهو زيه زى العفن وجوده يصبح ندم مين قال دا كان م البيت مين قال دا حتى ضيوف دا خسارة فيه الكلام وخسارة دبحُه بسيوف سِيبُوه لِوَحْدُه العَدَمْ وللا اطلبوه يِنْعَدَم كفاية عليه حَسرِتُه وقت الحساب يترجى مين يرحمه يقول دى كانت ظروف ........................ الظَرفْ إللى أعرفه إنك تقولها بوضوح إللى يحب الوطن يِبْنِى ويِعَلى فى صروح وإللى همومه وطن يزيد معاه الطموح بأن بكرة جاى أحسن ما يومنا يِرُوح لزمتها إيه العتاب ما كفاية فتح جروح .................. من أول السطر نِبْدَأ نِرْجَعْ لمعروفنا نِغْزِلْ خيوط الأمل نِدَّفَا من صوفنا تعالوا نِلِمْ الوطن ونشيله على أكتافنا نِصَلَحْ إللى انكَسَرْ ونِكْسَرْ سنين خوفنا واللى افتَرَقْ من حروف هتْجَمعُه حروفنا وبدال ما نبقى فِرَقْ الفُرْقَة ما تْشُوفنا وتوَحِّدُوا إللى خلق وتوَحِّدُوا صفوفنا ,,,
