سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
انقطاع الكهرباء يعيد الجدل على مواقع التواصل..النشطاء يحمِّلون "مرسى" المسئولية.. ويؤكدون:الوزارة متواطئة مع مصانع الشمع.. رافعين شعار "اجرى يا ابن آدم جرى الوحوش يا تلحق النور قبل ما يقطع يا متلحقوش"
أعاد تكرار انقطاع التيار الكهربائى الجدل مرة أخرى لمواقع التواصل الاجتماعى، حيث أثار غضب الكثيرين، الذين عبروا عن استيائهم عبر هاشتاج يحمل عنوان "النور قطع"، والذى حمل عبارات الغضب من استمرار انقطاع التيار لفترات طويلة، مطالبين المسئولين بإيجاد مبرر منطقى للأمر. وكما حمل الهاشتاج عبارات الغضب والاستياء فهو حمل أيضا التعليقات والصور الساخرة، والتى جاءت موجهة لوزارة الكهرباء والطاقة، ومتهمة إياها بالتواطؤ مع شركات تصنيع الشموع. ورغم عزله وعدم وجوده فلم يفلت مرسى وجماعة الإخوان من سخرية رواد مواقع التواصل الاجتماعى، والذين استخدموا نفس العبارات المتضررة التى كانوا قد استخدموها فى عهد مرسى، قائلين "دعاء قطع النور.. الله يخربيت الراجل اللى ماسك السكينة ويخربيتك أنت كمان يا مرسى أنت اللى علمتهم العملة المنيلة دى"، و"الله يخربيتك يا مرسى، حتى وأنت فى السجن معذبنا"، و"كل ما النور يقطع هكتب على تويتر منك لله يا مرسى أنت وجماعتك". فيما تساءل النشطاء عن أسباب انقطاع التيار الكهربى مستخدمين الأسلوب الساخر، قائلين "تفتكر إيه المشروع اللى محتاجينه عشان نحل مشكلة الكهرباء؟"، و"إيه يعنى لما النور قطع تلات أربع مرات لمدة كام ساعة فى اليوم؟ وهيكون إيه السبب يعنى؟.. أكيد الحكومة بتقطع النور عشان تعرفنا قيمته". واتهم أحد النشطاء وزارة الكهرباء والطاقة بالتواطؤ مع شركات تصنيع الشموع قائلا "يمكن الحكومة بتقطع النور عشان فى صفقة شموع جيه من برة وعيزين يخلصوها أو أكيد وزارة الكهرباء عاملة صفقة مع شركات الشموع وبينفعوا بعض". وتبادل النشطاء عددا من العبارات الساخرة للتعبير عن غضبهم من انقطاع الكهرباء، قائلين "النور بقى يقطع أكتر ما الأهلى بقى يخسر"، و"لا بس الحق يتقال الراجل اللى بيقطع النور ده محترم أوى ملتزم فى مواعيده.. ساعة الصبح وساعة بليل تقولوش دوا كحة"، و"النور كالسيف إذ لم تقطعه بيقطع لوحده"، و"الحمد لله إنى عشت للحظة اللى شوفت النور وهو بيجى لقد هرمنا من أجل هذه اللحظة". وتابع النشطاء ساخرين "الحمد لله كان عندنا اختراع اسمه النور وراح"، و"ﻗﻄﻊ ﺍﻟﻨﻮﺭ ﻛﻞ ﻳﻮﻡ ﺑﻘﻰ أﺳﻠﻮب ﺣﻴﺎﺓ ﺧﻼص"، و"خامس مرة النور يقطع النهاردة! خمسة وخميسة فى عين الحسود"، و"اجرى يا ابن آدم جرى الوحوش يا تلحق النور قبل ما يقطع يا متلحقوش"، و"مرة واحد مصرى النور مقطعش عنده اتعمى مالفرحة". وأعرب النشطاء عن غضبهم من انقطاع التيار الكهربى، قائلين "حسبى الله ونعم الوكيل فى اللى السبب فى قطعان النور امتحاناتى قربت حرام عليكو"، و"يا جدعان حد يقولى فى دولة فى العالم النور بيقطع فيها 5 مرات فى اليوم ليه يا جدعان هو احنا كفرة"، و"اللى يضايق بقى أن النور مش بيقطع فى الأوقات والناس نايمة"، و"ممكن تعرفونا النور بيقطع كام مرة ومواعيده لأن الوضع بجد ممل البلد اللى مش عاوزة تتعدل بقى".